Бірінші нысан «ҚТЖ» ҰК» АҚ еншілес компаниясы «Қазтеміртранс» АҚ үшін 1 мың ашық вагонды дайындау және жеткізу міндетін табысты орындаған «Қазақстан вагон жасау компаниясы» ЖШС өндірістік алаңы болды.
– Осындай қысқа мерзім ішінде айына 150 жартылай вагон шығаруды жолға қоюға болатынына сенгендер қатары аз болды. Бұл – үлкен жетістік. Қазақстан экономикасы қарқынды дамуын жалғастырып, заманауи кәсіпорындар іске қосылып, жаңа кен орындары әзірленуде, сондықтан алдағы 3-5 жылда жартылай вагондарға деген қажеттілік тек арта түседі, – деді Қ.Әлмағамбетов.
Айта кету керек, бұл жоба мемлекет қолдауымен жүзеге асырылды. «Бәйтерек» ҰБХ» АҚ және «Өнеркәсіпті дамыту қоры» АҚ биыл темір жол мұқтажы үшін 1 мың жартылай жүк вагонын өндіруге және жеткізуге 23,3 млрд теңге бөлді.
Жаңа ашық вагондар темір жол учаскелеріне бөлінді: Жаңа-Қарағанды-Брест – 325, Жомарт-Кавказ – 65, Шұбаркөл-Лужская – 200, Шұбаркөл-Вышестеблинская – 200, Қызылжар-Электр стансасы – 65 және Қоржынкөл-Электр стансасына 145 бірлік.
– «Қазтеміртранс» АҚ паркі жаңа жылжымалы құраммен толықты. Бұл ретте, жаңа инновациялық вагондардың жөндеу аралығының ұлғаюы өте ыңғайлы, – дейді «Қазтеміртранс» АҚ тасымалдауды қамтамасыз ету департаментінің директоры Нұрлан Есембаев.
Сонымен қатар, Қ.Әлмағамбетов Екібастұзда орналасқан Railways Systems KZ ЖШС компаниялар тобының нысандарын аралады. «Проммашкомплект» ЖШС-да темір жол дөңгелектерін өндірудегі жағдай туралы айтылды. Егер 2019 жылы 53 мыңға жуық доңғалақ шығарылып, жөнелтілсе, 2020 жылы – 154 мың, ал биыл шамамен 120 мың дөңгелек шығарылды. Өнім Қазақстан бойынша да, шетелдерге де қойылады.
Ал RWS Wheelset ЖШС-да темір жол осьтері мен дөңгелек жұптары шығарылады. Осы жылы кәсіпорын Петропавлдағы «ЗИКСТО» АҚ үшін 10 мың дөңгелек жұптарына және «Қазақстан вагон жасау компаниясы» ЖШС үшін тағы 4 мың дөңгелекке тапсырыс берді.
