Экономика • 14 Қазан, 2021

Саудиямен сауда-саттық жанданады

Қазақстан мен Сауд Арабиясының үкіметаралық комиссиясының отырысында еліміз араб мемлекетіне сомасы 400 млн долларға жуықтайтын түрлі саланы қамтитын өңделген тауардың 100 түрін жеткізуге келісті. Бұл туралы Сауда және интеграция министрлігінің баспасөз қызметі хабарлады.

Жақсылық САҒАДАТ

Сауд Арабиясы – Қазақстанның Парсы шығанағындағы сенімді серіктестерінің бірі. Соған қарамастан әлемді жаулаған індеттің салдарынан екі жақтың сауда-экономикалық байланысы біраз тұралап қалғаны жасырын емес. Алайда араб елімен арадағы ынтымақтастықты арттыруға мүмкіндігі мол, бірақ әлеуеті толығымен ашылмаған экономиканың секторы көп. Сол себепті Қазақстан бұл бағытты дамытуға ниетті.

Мәселен, еліміз түрлі салаларда өңделген тауардың 100 түрін жеткізу бойынша экспорт номенклатурасын 398,5 млн долларға дейін кеңейтуге дайын. Бұл тізімде машина жасау, қара металлургия, тамақ өнеркәсібі және тағы басқа салаларға қатысты тауарлар қамтылған.

Тараптар екі елдің іскерлік орталарының ынтымақтастығын тереңдетуге және бірлескен іс-шараларды ұйымдастыруға, оның ішінде өнімді бір елден екіншісіне жеткізіп, сату үшін уақытша немесе тұрақты көрме павильондарын (showroom) ашуды пысықтауға келісті. Қазақстан мен САК өз елдерінде әлеуетті сатып алушыларды іздестіруде бір-біріне жәрдем көрсетуге уағдаласты.

Сонымен бірге Қазақстан ауыл шаруашылығы, мұнай химиясы, туризм, тау-кен металлургия кешені және қаржы сияқты салаларда бірлескен инвестициялық жобаларды іске асыруға байланысты саудиялық компанияларды тартуға мүдделі.

Атап айтқанда, Бақыт Сұлтанов саудиялық әріптесіне елімізде тауар өткізу жүйесін құру жөніндегі жобаның іске қосылғаны туралы айтты.

Екі жақ ауыл шаруашылығы өнімдерінің саудасын жүзеге асыру кезінде карантиндік фитосанитарлық талаптарға байланысты тәжірибемен алмасуға, сол секілді өсімдіктер карантині бағытында ынтымақтасуға уағдаласты.

Ынтымақтастықтың жаңа бағыты ретінде «жасыл экономика» қарастырылуы мүмкін. Эр-Рияд бірлескен жобаларды іске асырып, технологиялармен алмасуға байланысты және маман даярлау ісінде зор перспективалар бар екенін жоққа шығармады. Тараптар күн, сутегі энергетикасы және бейбіт атомды қоса алғанда, балама және жаңғырмалы энергетика саласындағы серіктестік жолдарын пысықтауға келісті.

Күннің маңызды және өзекті жаңалықтарын «Егемен Қазақстан» телеграм каналынан оқыңыз