Сутегі құю бекетін салмақ

Құжат тараптардың сутегі қозғалтқышы бар автомобильдерге арналған сутегі құю бекетін ұйымдастыруды көздейді. Сон­дай-ақ бекетті Атырау зауы­тын­дағы «Эр Ликид Мунай Тех Газы» серіктестігі қондыр­ғы­лары­ның сапасына сәйкес келе­тін сутегімен қамтамасыз ету жүк­телген. Аталған технология Қазақ­станда алғаш рет ұсынылып отыр.

Жоба екі кезеңнен тұрады. Бірінші кезеңде, яғни 2022 жылғы наурыз айының соңына дейін Атырау қаласында мобильді сутегі құю бекетін орнату, сондай-ақ Атырау мұнай өңдеу зауыты қызметкерлерін тасымалдайтын сутегі қозғалтқышы бар автобустар мен жеңіл көліктер сатып алу қарастырылған.

Екінші кезеңде, яғни 2022 жылдың соңына қарай «Эр Ликид Мунай Тех Газы» серіктестігімен бірлесіп сутегі құю бекетін тиісті сападағы сутегімен қамтамасыз ету бойынша жұмыстар кешенін аяқтау және Атырау қаласында стационарлық сутегі құю бекетін іске қосу жоспарлануда.

– «ҚазМұнайГаз» сутегі энергетикасын дамытуды ұзақ мерзімді перспективада компания қызметін декарбонизациялау бағдарламасының басым бағыттарының бірі ретінде қарастырып отыр. Бұл Мемлекет басшысының 2060 жылға қарай көміртегі бейтараптығына қол жеткізу жөніндегі тапсырмасына сәйкес келеді және жалпы әлем­дік трендтермен де үндесіп жатыр. Көміртегі көлемін азай­ту актив­тер құнының өсуіне ғана сеп­тігін тигізіп қой­май, біздің инвес­тициялық тартым­дылығымызды да арттырады, – дейді ұлттық компания­ның басқарма төрағасы Алик Айдарбаев.

Қазіргі уақытта «ҚазМұнайГаз» 2022-2031 жыл­дар­ға арналған даму стратегия­сын өзектендіруде. Бұған қоса төмен көміртекті даму бағ­дар­ламасы мақұлданды. Компа­ния 2031 жылға қарай СО2 шы­ға­рындыларын 2019 жыл­ғы деңгейден 15 пайызға төмен­детуді көздеп отыр. Бұл шамамен 1,6 млн тонна СО2-ні құрайды.

Аталған мақсатқа энергия тиімділігін арттыру, энергия үнемдеу саласындағы іс-шараларды жүзеге асыру, жаңартылатын және сутегі энергетикасын дамыту, көміртегіні өндіру және сақтау жөніндегі технологияларды қолдану, орман-климаттық жобаларды іске асыру арқылы қол жеткізу жоспарланған. Қазірдің өзінде ұлттық компания осы бағытта әлеуетті арттыру және өндірілген сутегіні өз активтерінде пайдалану үшін сутектік мобильділік саласындағы қанатқақты жобаны іске асыра бастады.

Еске сала кетейік, сутегі отыны бензин мен дизельге эко­ло­­гиялық балама болып саналады. Өйткені ол жанғанда бу шығады. Сонымен қатар сутегінің бензинге қарағанда шығыны әлдеқайда аз – 100 шақырым үшін бар-жоғы 0,6 кило сутегі жұмсалады. Сутегі құю бекеті сутегіні сақтау, сал­қындату, сығымдау және тарату жүйелерінен тұрады.

Жобаның серіктесі – Фран­ция­ның Air Liquide компания­сы. Компания соңғы 50 жылда сутегі жеткізудің барлық тізбегін, яғни оны өндіруден бастап сақтау­ға, соңғы тұтынушыларға ар­нал­ған қосымшаларды әзірлеу және таратуға дейінгі аралықты қамтиды. Бүгінгі таңда компания әлем бойынша 120-дан астам сутегі құю бекетін жобалап, іске қосты.