Осы жылдың тоғыз айында Солтүстік Қазақстан облысында былтырдың сәйкес мерзімімен салыстырғанда экономикаға инвестиция құю көлемі – 17,5%-ға, өнеркәсіп өндірісі – 6,7%-ға, тұрғын үй салу көлемі – 6,5%-ға, құрылыс жұмыстарының көлемі 1,7%-ға артқан. Өндірістің өсімі бар екенін байқауға болады. Әсіресе, ауыл шаруашылығы өнімдері қатарында көптеп тұрғызыла бастаға тауарлы-сүт фермаларын арқылы сүт өнімдерін шығару күрт артуда. Өткен 9 айда ауыл шаруашылығының жалпы өнімі былтырмен салыстырғанда барлық ауданда артқан. Жалпы көлемі 833,9 млрд теңгенің өнімі шығарылған. Тек Мамлют, Ғ.Мүсірепов және Тимирязев аудандарында белгіленген меженің 95-96%-ы орындалған, қалғанының бәрі жүздің үстінде. Соның ішінде облыс бойынша ет өнімдері – 2,1, сүт өнімдері 6,1%-ға артқан. Дегенмен артта қалушылықтар да жоқ емес, тек Петропавл қаласында ғана ет өнімдерін шығару жоспары 38%-ға орындалмаған. Сондай-ақ Қызылжар ауданында жұмыртқа өндіру көлемі 43,1%-ға дейін құлдыраған. Облыстағы аса ірі үш құс фабрикасы – осы ауданның аумағында. Кәсіпорындар былтырғы және аз мөлшерде болса да биылғы құс тұмауынан қырылған құс басын қалпына келтіре алмағандықтан, жұмыртқа өндіру көлемін әлі өрістете алмай отыр.
Бүгінгі таңда облыс шаруашылықтарында 407,5 мың ірі қара, 444,6 мың қой-ешкі, 139,8 мың тұяқ жылқы бар. Тоғыз айдағы малдың барлық түрі бойынша өсім байқалады. Мәселен, жылқы саны осы кезеңде 3,9%-ға, ірі қара саны 4,2%-ға артқан.
Қазір мал санын көбейтумен қатар түрлі аурулардың таралуын бақылау да күн тәртібінен түспейді. Тамыз айында эпизоотикалық ахуалы алаңдатарлық болған Ақжар ауданындағы «Ақ ниет-Агро» ЖШС аумағына бір ай карантин енгізіліп, агроқұрылым басшысы 100 АЕК (146 мың теңге) көлемінде айыппұл салынған. Мемлекеттік санитарлық инспекторлар белгілеген шектеу шаралары да толық орындалмаған әкімшілік бірліктер бар. Мысалы, Уәлиханов ауданындағы Көктерек ауылдық округының Мортық ауылына енгізілген шектеу шаралары толық орындалмай, ол 33 күнге созылған. Қосалқы шаруашылығы бар мал иелеріне ветеринарлық заңнаманы бұзғаны үшін 243 рет айыппұл салынып, 7,5 млн теңгеден артық қаржы өндірілген. Сондай-ақ өз міндеттерін толық орындамаған 23 ветеринарлық маманға 984 мың теңгенің айыппұлы салынған.
Сырттан әкелінетін малдарды тексеру үшін барлық кедендік бекеттерде ветеринарлық қызметтер ашылған. Тоғыз айда олар мал әкеле жатқан 2 768 көлік құралдарын тексеріп, ветеринарлық талапты сақтамаған 19 көлікті кері қайтарған, ал 3 көлікке 87 мың теңгенің айыппұлын салған.
Тоғыз айдағы өсім өнеркәсіп саласында да орын алды. Әсіресе, өңдеу өнеркәсібі белгіленген межені 7,6%-ға асыра орындаған. Артта қалушылар арасында тау-кен өнеркәсібі келеді. Пайдалы қазба өндірі өткен жылдың сәйкес мерзімімен салыстырғанда 28,3%-ға төмендеген.
Аталған мерзімде құрылыс қарқыны өткен жылдың сәйкес мерзімінен 1,7%-ға немесе 70,2 млрд теңгеге артқан. Соның арқасында 119,6 мың шаршы метр тұрғын үй пайдалануға берілді. Облыста құрылысты ең жоғары қарқынмен Тайынша ауданы жүргізіп келеді. Ондағы құрылыс былтырғы көрсеткіштен 20 пайызға асқан. Сондай-ақ Петропавл қаласының құрылыс қарқыны да жоғары. Өткен жылдың сәйкес мерзімімен салыстырғанда мұндағы өсім 11,9%-ға артық.
Экономикалық өсім біршама жақсы болғанымен облыс халқы санының өсімі ауыз тұщынтпайды. 2021 жылдың 1 қыркүйегіндегі халық саны 540 мың адам болып отыр. Ал былтырғы 1 қыркүйекте ол 546 мың болған. Бұған әсер етуші факторлар көп. Соның бірі – көшіп кетушілер санының келгендерге қарағанда артық екені. Биыл бұл көрсеткіштің өзі былтырғымен салыстырғанда 3,1%-ға азайған, яғни тоғыз айдағы көшіп кетушілердің саны келушілерден 3 008 адамға ғана артық. Ең өкініштісі сол, облысқа басқа өңірлерден қоныс аударушылар санының былтырғыдан 9,6%-ға азайғаны болып отыр. Мұның ең басты себебі «Еңбек» бағдарламасымен қоныс аударған халықты қарсы алудың кемшін тұстары көптігінен. Қысы қатты Солтүстікке сұлуынан жылуы артық үйлер керек еді, бірақ бағдарламаны жасағандер тек сұлулық жағына көңіл аударып, қоныс аударушы үшін 8 млн теңгеге бағалаған үйлерінің сырты сұлу болғанымен іші суық болып жатыр. Бір пысықай жігіттердің бір күндік бригадалары мұндай «қуыршақ» үйлерді қаптата салып, оны өкіметке 8 млн-ға сатып, өздері жоқ болады. Егер қоныс аударушының өзіне 8 млн теңгенің көлеміндегі сатылатын үйді таңдатып, алып берген болса, «қой да тыныш, қасқыр да тоқ» болар еді. Ал сатылатын жақсы үйлер толып жатыр. Өзі таңдаған үйді «суық» деп қоныс аударушы да ешкімнің мазасын алмас еді.
Санаққа да халық белсенділікпен қатыспауда. Жуырда облыс әкімі Қ.Ақсақалов осыған орай үндеу жариялап, халықты осынау маңызды іс-шараға белсене қатысуға шақырды.
Биылғы тоғыз айда облыстың жергілікті бюджеттеріне түскен салық былтырғымен салыстырғанда 103,2%-ға орындалған. Яғни жоспардағы 49 млрд 166 млн теңгенің орнына бюджеттерге 50 млрд 743 млн теңгенің салығы түскен. Ал бюджеттің шығыс бөлігі 99,8%-ға орындалған. Яғни жоспарланған 253 млрд 336,4 млн шығыс 252 млрд 930,3 млн теңгеге орындалған. 406 млн теңгенің шығысы игерілмей қалған. Республикалық бюджеттен бөлінген мақсатты трансферттер мен несиелердің шығысы 99,8%-ға игеріліп, 137,9 млн теңгесі қалған. Қолға берілген қаржыны толық ұқсата алмағандардың алдыңғы қатарында Жолаушы тасымалы көлігі мен автомобиль жолдары басқармасы мен Білім беру басқармалары бар. Бұлардың алдыңғысы 203,3 млн, соңғысы 126 млн теңгені игере алмаған.
Міне, облыстың тоғыз айдағы тыныс-тіршілігі қысқаша шолғанда осындай болып отыр.
