Жалпы кеше өткен саяси науқанда 16 млн-нан астам сайлаушы конституциялық құқығын пайдаланған. Бұл – барлық дауыс берушінің шамамен 80,8 пайызы. Бүгін бұлардың қатарына АҚШ-та жүрген Өзбекстан азаматтары да қосылады. Мұхиттың арғы жағындағы сайлау учаскелері ең соңғы болып жабылды.
Орталық сайлау комиссиясының мәліметінше, Өзбекстандағы сайлау демократиялық талаптарға сай өткен. Саяси науқанға деген қызығушылық жоғары болған.
«Сайлау барысын бақылау үшін учаскелерге 414 камера орнатылған болатын. Бұл науқаннан 1672 БАҚ өкілі хабар таратты. Тағы 54 мемлекеттен келген 1 мыңға жуық байқаушы дауыс беру үрдісін қадағалады. Тағы Өзбекстан тарихында алғаш рет сотталғандар да ел президентін таңдау мүмкіндігіне ие болды», деді Өзбекстан орталық сайлау комиссиясының төрағасы Зайниддин Низамходжаев.
