Республика жұртшылығы Президент Н.Ә.Назарбаевтың Үкіметтің
кеңейтілген отырысындағы сөзін қуана қолдап отыр
14 ақпанда Елбасы Нұрсұлтан Назарбаевтың Үкіметтің кеңейтілген отырысын өткізгені белгілі. Бұл алқалы басқосуда Мемлекет басшысы алға қойған міндеттер қазақстандықтар тарапынан үлкен қолдауға ие болды.Бұл – бәрімізге ортақ тірлік
Мен 45 жылдан бері құс шаруашылығы саласында еңбек етіп келемін, бүгінде ұлдарым мен немерелерім осы аталған шаруашылықта ұрпақтар сабақтастығын жалғастыруда. Бір қуанарлығы, бұл тек менің отбасымдағы ғана кәсіп жалғастығы емес, біздің «Шымкент құс» ЖШС-інде 550 адам қызмет етсе, соның ішінде бүгінде 50 отбасында ата-әке жолын қуған үшінші буыны еңбек етіп келеді. Елбасы Н.Назарбаевтың тұрғындардың табыстарын қолдау жөніндегі халықтық тапсырмалары өте орынды әрі дер кезінде қолға алынып отыр. Бұл Елбасының халықтың жағдайын бір сәт те есінен шығармайтынын білдірсе керек. Елдің жағдайын жасау – бәрімізге ортақ тірлік. Біз алдағы уақытта кәсібімізді жандандыру үшін инвесторлар тартып, өндірісті жаңа технологиямен жабдықтауды жоспарлап отырмыз. Бұл, әрине, өнім көлемін ұлғайтып, жұмысшылардың жалақысын өсіретіні сөзсіз. Президент тапсырмасын қолдау мақсатында осы бастан жаңа мүмкіндіктерді қарастырып жатырмыз. Жалпы, облысымыз еліміз бойынша көш бастап келеді. Сондықтан Елбасының тапсырмасы бізге үлкен жауапкершілік жүктейді. Әбілқасым ДОСБОЛОВ, «Шымкент құс» ЖШС бақылау кеңесінің төрағасы. Оңтүстік Қазақстан облысы.Жүрекке жылу қосады
Мен бұрынғы Ленин ауданындағы Горький атындағы шаруашылықта отыз жылдан астам механизатор болып жұмыс істедім. Қалаға көшіп келгенімізге де біраз болды. Ондағы ой сырқат әйелімді емдету еді. Қуанышымызға орай, облыстық онкологиялық ауруханада жасалған ота сәтті болып, үй-ішіміздің шырайы кіріп қалды. Ұл мен қызымызды аяқтандырып, мамандық алуына мүмкіндік жасадық. Бірақ, өзімнің де жүрегім сыр беріп, квота арқылы Көкшетаудағы кардиологиялық орталықта ота жасатуыма тура келді. Комиссия биылғы жылдың басында үшінші топтағы мүгедектікке шығарды. Атаулы әлеуметтік көмек тағайындалды. Қаңтар айында үлгірмегендіктен, екі айдың төлемін қосып алмақпын. Осы қаңтар айы қамкөңілімізді жадыратқандай жылылыққа толы болды. Елбасы Н.Назарбаевтың жақсы жаңалықтарға толы Жолдауы жарияланды. Үкімет онда көрсетілген тапсырмаларды орындауға жедел кірісіп кетті. 1 қаңтардан әлеуметтік төлемдер 7 пайызға көбейтілді. Ал 14 ақпандағы кеңейтілген мәжілісте Елбасымыз оны тағы да 5 пайызға үстемелеп, 12 пайызға жеткізуді тапсырды. Бұл біздің көңілімізді көтеріп, ертеңгі күнімізге сенім ұялатты. Оның үстіне, арнайы есепте тұратындықтан, дәрі-дәрмекті жеңілдетілген бағамен аламыз. Мемлекет басшысы қоғам мүшелерінің табыстарын қолдаудың халықтық 6 тапсырмасын белгілеуі «Мәңгілік Елдің» мұраттары жарқын екендігін дәлелдейді. Әсіресе, әлеуметтік сала қызметкерлерінің еңбекақысы 40 пайызға көтерілетіні – сауапты қадам. Мүмкіндігі шектеулі адамдар мұны жақсы түсінеді. Бақыт ДҮЙСЕНОВ, ІІІ топтағы мүгедек. КӨКШЕТАУ.Түсім түрлерін арттыру керек
Үкіметтің кеңейтілген отырысында Елбасы қоғамдағы қадау-қадау мәселелер турасында сөз қозғады. Соның бірі ретінде, жергілікті өзін өзі басқару органдарында түсім көзі толық шешілмей тұрғанын айтты. «Үкімет пен Ұлттық банк мемлекет пен жекеменшік әріптестігін іске асыру жобасы бойынша даму институттарынан, зейнетақы қорларынан, қаржылық ұйымдардан қаражат тарту жөніндегі ұсыныс бойынша нақты нәтиже шығара алған жоқ. Ауыл шаруашылығы жөніндегі мәселелер де шешімін тапқан жоқ. Бұл тізімді одан әрі де жалғастыра беруге болады. Ал бұлардың бәрі де Жолдаудың сапалы түрде орындалуына қажетті маңызды мәселелер», деді Нұрсұлтан Әбішұлы. Мемлекет басшысы атап айтқан мәселе бойынша Қызылорда облысында біршама алға ілгерілеушілік байқалады. Былтыр аймақ салық түсімдерін арттыру мен инвестиция тарту шаруасында республикада жоғары көрсеткішке ие болғаны сөзіміздің айғағы болса керек. Әрине, инвестиция тартудың оңай емес екені белгілі. Дегенмен, Қызылорда облысында бұл тұрғыда ауқымды және жүйелі жұмыс жасалды. Өткен жылдың ішінде екі рет «Байқоңыр» инвестициялық форумы ұйымдастырылып, оған өзге елдерден бизнес өкілдері мен елімізде тіркелген елшілік өкілдері шақырылып, аймақтың барлық мүмкіндіктері толық таныстырылды. Осының арқасында Сыр бойына инвесторлар келе бастады. Салық түрлері түсімінің артуына шағын және орта кәсіпкерлік дамуына жасалған жайлы жағдайдың әсер еткені де анық. Бүгінде Қызылорда облысында кәсіпкерліктің кең қанат жаюы үшін тиісті көмек жасалып жатыр. Әлбетте, тұтастай алғанда, елімізде Елбасы айтқан мәселенің толықтай орындалмай тұрғаны ақиқат. Сондықтан жергілікті басқарушы органдар республикалық бюджеттен түсетін қаржыға байланбай, аймақтың ерекшеліктерін ескере отырып, түрлі саланы дамытып, инвестиция тартуы шарт. Бұл бүгінгі биліктің әртүрлі тармақтарында жұмыс істеп жүрген азаматтарға қойылатын басты талаптың бірі болуы керек. 2012 жылы Халықтық IPO бағдарламасы көтерілді. Дегенмен, осы бір игі бастама өз дәрежесінде атқарылмағаны жасырын емес. Мұның да өзіндік себептері бар шығар. Алайда, аталған бағдарлама жұртшылықты ырысқа кенелтетін жобаның бірі дер едік. Сондықтан бұл тұрғыда да кешенді жұмыстар атқарылуы тиіс. Ең алдымен, халыққа түсіндірме жұмыстарын жүргізген абзал. Өйткені, бағдарламаның толықтай атқарылуы халықтың ынта-ықыласына тікелей байланысты. Бастысы, елдің игілігі үшін қабылданған құжат орта жолда қалып қоймауы керек. Қамбар ӘЖІБЕКОВ, қаржыгер. ҚЫЗЫЛОРДА.Айтылуында кемдік жоқ, мәселе орындалуында
Мемлекет басшысы Н.Назарбаевтың «Көлеңкелі экономиканы» ауыздықтау туралы айтуы, тиісті орындарға тапсырма беруі – өте құптарлық іс. Өйткені, егіннің немесе бау-бақшаның дұрыс өсуі үшін онымен жарыса өскен арамшөптерді жұлып, маңайды тазартып отырады ғой. Сол секілді белгілі бір кәсіп түрімен айналысқан кәсіпкер елдің дамуына өз үлесін өнім өндірумен ғана қосып қоймай, заңдық негізде салық төлеп, мемлекетіміздің барлық заң-талаптарын қатаң сақтауы шарт. Мұның бәрінен жалтарып, тек өз есебін түгендеумен айналысатын «кәсіпкер мен кәсіпкерліктің» ғұмыры ұзаққа бармайтыны белгілі. Менің кәсіпкерлік тарихым 1988 жылы кооперативте жұмыс жасаған кезімнен басталды деуіме болады. Ал өртке қарсы қызмет көрсету және құрылыс жұмыстарымен айналысатын ЖШС-ні 2000 жылы аштым. Содан бері тәуелсіз еліміздің заңы аясында, барлық талап-тәртіптер шеңберінде жұмыс жүргізіп келеміз. Бәрі дұрыс болған соң, көңіл де тыныш, жұмыс алаңсыз. Елбасы «көлеңкелі экономика» көлемі ішкі жалпы өнімнің бестен бірін қамтитын шамаға жеткендігін айтумен қатар, оның салдарының қаншалықты болатындығын құлағдар етті. Ендігі кезекте ел Үкіметі Елбасы тапсырмасын кешіктірмей орындап, белгіленген мерзімге аталмыш келеңсіздікті ауыздықтаудың жолдарын ұсынса дейміз. Бұлай деуімнің себебі де жоқ емес, өйткені, Елбасы 2013 жылдың күз айында берілген 33 тапсырманың 11-і орындалғанын айтты, ал «көлеңкелі экономика» тұрғысында әлі ештеңе жасалып үлгермеген... Демек, тапсырма қайталап берілді, «ұзын арқау, кең тұсауға» салудың қажеттілігі жоқ деп білемін. Мемлекетіміздің одан әрі нығая түсуі үшін қажетті бағыттар айтылып, тапсырмалар жүктелген мәжілісте инвестиция тартудың жайбасарлығы туралы да орынды айтылды. Нарықтық экономиканың табалдырығын тәуелсіздікті алысымен аттаған жас мемлекетімізге инвесторларды тарту, инвестиция құйдыру – барынша қажетті іс. Мұнайлы Маңғыстау аймағында инвесторлар көбіне мұнай-газ салаларына қызығушылық танытады. Ал инвесторларды ауыл шаруашылығына тарту үшін не істеу керек? Тиісті орындар осындай тұстарды бағамдап, нақтылауы тиіс. Өңірімізде құрылған «Ақтау арнайы экономикалық аймағында» кәсіпкерлер үшін түрлі жеңілдіктер қарастырылған. Аймақтың жұмысын одан әрі жетілдіріп, инвесторларды әр салаға тартудың тетіктері қарастырылса деймін. Мемлекет басшысы тарапынан айтылып, тиісті тапсырмалар беріліп жатыр, енді орындалудағы олқылықтар жөнделсе екен. Гаджимагоммед СЕЛИМОВ, «Самур» лезгин этномәдени бірлестігінің төрағасы, «Пожстройсервис» ЖШС директоры. Маңғыстау облысы.Ұстаздардың да ұлттық мақтанышы
Елбасы дәстүрлі Жолдауында еліміздің ұзақ мерзімге бағдарланған зор әлеуеттерімізді белгілеп, оның ішінде бірегей сапалы білім беру жүйесін жақсартудың айқын мақсаттарын қойғаны мәлім. Осы орайда, ұстаздар қауымы алдында заманауи бағдарламалар мен оқыту әдістемелерін жетілдіру, жалпы білім беретін мектептерді Назарбаев Зияткерлік мектептеріндегі оқыту деңгейіне жеткізу, оқушыларды сындарлы ойлау, өзіндік ізденіс пен ақпаратты терең талдау машығына баулу секілді ауқымды талаптар тұрғанын баса айтқым келеді. Ал үлгерімі жақсы студенттер мен оқушылардың шәкіртақысын, білім беру саласы қызметкерлерінің еңбекақысын өсіру жөніндегі қадамдар әлеуметтік қорғауды одан әрі қамтамасыз етері анық. Енді, міне, үстіміздегі жылғы Жолдаудың тапсырмалары мен «Қазақстан-2050» Стратегиясын орындау мәселелеріне қатысты өткен Үкіметтің кеңейтілген отырысында халықтың тұрмысы мен өмір сапасын жақсартуға бағытталған кешенді әлеуметтік пакеттердің қабылданғанын естіп, қуанып отырған жайымыз бар. Иә, Президентіміз қазақстандықтардың өмірін жарқын ете түсетін нақты практикалық істер бағдарламасын әркез ұсынып келеді. Соның нақты үлгісіне биылғы 1 сәуірден бастап мемлекеттік мекемелер мен мемлекеттік қазынашылық кәсіпорындарда қызмет ететін азаматтардың еңбекақыларына ай сайын 10 пайыздан үстеме төлеу қарастырылатынын айтар едік. Бұл санатқа білім беру, ғылым, денсаулық сақтау, мәдениет, спорт және әлеуметтік қолдау саласының өкілдері жататынын ескерсек, күрделі жаһандық бәсекелестік жағдайдың өзінде Мемлекет басшысы белгілеп берген 7 басым бағыттардың ойдағыдай орындалып жатқанын аңғаруға болады. Бұған келесі жылдың 1 шілдесінен бастап осы топқа жататындарға еңбекақы төлеудің жаңа моделін жасау жөнінде Үкіметке тапсырма берілгенін еске алсақ, атап айтқанда, білім беру саласында жалақының 29 пайызға көтерілетіні экономикалық тұрақтылығымыздың, қарышты дамуымыздың арқасы деп білеміз. Алдағы мақсатымыз айқын: ол – ең өркениетті 30 елдің қатарына қосылу. Ел тарихындағы жаңа дәуірдің кемел келбеті – өзгелер секілді ұстаздардың да ұлттық мақтанышы. Құрыштай бірлігіміз бен тапжылмас тұрақтылығымыз сыналатын үлкен емтиханнан сүрінбей өту жолында еліміздің ертеңіне сеніммен қарайтын ұрпақ тәрбиелеп келе жатқан білім беру саласы қызметкерлері де аянбай еңбек ете беретін болады. Зәуреш ЖИЕНТАЕВА, «Әл-Фараби» мектеп-лицейі директорының оқу-тәрбие жөніндегі орынбасары. Петропавл.Дер уақытында көрсетілген қолдау
Елбасы Нұрсұлтан Назарбаев Үкіметтің кеңейтілген отырысында шағын және орта бизнестің дамуына жағдай жасау, ол үшін жүйелі шараларды әзірлеу керектігін айтты. Нұрсұлтан Әбішұлы орта және шағын кәсіпкерлікті дамыту жөнінде биылғы Жолдауында да айтқаны белгілі. Мемлекет басшысы осы мәселені өте дұрыс көтеріп отыр. Расында, кәсіпкерлерге іс ашу үшін капитал керек. Олар екінші деңгейлі банктерге жүгінеді, ал банк берген несиесін бір жылдан кейін қайтара бастауды талап етеді. Бір жылда ешқандай кәсіпорын аяғынан тік тұрып, пайда тауып кетпейді. Кәсіпорындар кемеліне келуі үшін 5-6 жыл уақыт керек. Ұзақмерзімді несие болмаған соң, кәсіпорын дамудың орнына нарықтың талабына да, банктің талабына да ілесе алмай, тығырыққа тіреледі. Мысалы, мен тез дайындалатын кеспе өндіру үшін оны сегіз ай бойы зерттедім. Сосын Рудный қаласында зауыт ашуға бел байладым. Инновациялық-инвестициялық жобаның құны 150 миллион теңге болды. Біздің тек ұннан жасалған өніміміз Қытайдың арзанқол лапшасын дүкен сөресінен ысырады деп ойлаймын. Мен өнімнің тек сапасына ғана сеніп отырмын. Тұтынушы таңдау жасауға тиіс. Менің пікірімше, қазір елдегі шағын және орта бизнес кәсіпорындарында барлық жұмысшылардың шамамен 30 пайызы жұмыс істейді. Олардың қарасын мұнан да көбейту үшін кәсіпкерлік дамуы тиіс. Қазір кәсіпкерлерге тауар өндірісін ұйымдастыру, сапалы өнім шығару оңай емес. Өйткені, Қазақстанда бұрын өнеркәсіп кәсіпорындары, яғни ұқсату, өңдеу жүйесі қалыптаспады, инфрақұрылым нашар. Оның үстіне, бүгін бәсеке өте жоғары. Еуропа мен Ресейден, Қытайдан келетін импорттық тауарларға қарсы тұруымыз керек. Шағын және орта бизнес кәсіпорындары өндірген тауарларды сыртқа шығарғанда олар қазынамызға қаржы болып оралады. Бұл экономиканың дамуына да серпіліс берер еді. Ол үшін өндірген өнімнің сапасы мінсіз болуы, халықаралық стандартқа жауап беруі тиіс. Осы талаптардың барлығын кәсіпкер тапқан табысты несиеге төлеп жүріп орындауы мүмкін бе? Ел экономикасының дамуы шағын және орта бизнеске тікелей байланысты екенін алыстан болжаған Елбасының осы саланы, оның ішінде де өнім өндіретін кәсіпорындарды қолдау үшін Ұлттық қордан 1 триллион теңге қаржы бөлуді тапсырғаны мені аса қуантты. Мемлекет тарапынан осындай қолдауды сезінген кәсіпкерлер ешқайда жалтақтамай, ынтамен нарықты зерттейтін болады, бұл бастаған істің нәтижесін көруге құлшындырады. Ізденіске сай осындай қолдау болғанда, кәсіпорындардың сапалы өнім өндіру мәдениеті де арта түсеріне ешкімнің күмәні қалмайды. Азамат НҰРҒАЗИН, «Ақ барыс» НК» ЖШС директоры. Қостанай облысы, Рудный қаласы.Адымымыз аршынды болсын десек...
Біздің елімізде әлеуметтік қолдауға басым бағыт беріледі. Мұны жыл сайын зейнетақы мен әлеуметтік төлемдер мөлшерінің көбеюінен айқын аңғарып келеміз. Әсіресе, ұзақ жылдар бойғы бейнетті еңбегінің зейнетін көріп отырған зейнеткерлер де жасалып отырған әлеуметтік қолдаудан кенде емес. Елбасы Нұрсұлтан Назарбаевтың арнайы тапсырмасымен зейнетақымызға жыл сайын үстеме қосылады. Биылғы жылдың басында зейнетақы мөлшері 9 пайызға, ал мемлекеттік әлеуметтік төлемдер 7 пайызға көбейтіліп еді. Ал өткен аптадағы теңгенің долларға шаққандағы айырбас бағамының өзгеруіне байланысты зейнетақы мен әлеуметтік төлемдердің тағы да өсетіндігі, әсіресе, ардагерлер көңілін бір серпілтіп тастады. Мұнымен бірге, әр сала өкілдерінің де жалақысы өседі. «Алдымен... экономика» саясатын ұстанатын еліміз әлемдік қаржы дағдарысы кезінде де тұрмысы төмен отбасылар мен зейнеткерлерге әлеуметтік қолдау көрсетуін шектеп көрген емес. Біз еліміздің осынау берік ұстанымына, міне, тағы да куә болып отырмыз. Демек, халықтың тұрмысы төмендейді деуге еш негіз жоқ. Елбасы Нұрсұлтан Назарбаевтың өткен жұмадағы Үкіметтің кеңейтілген отырысында берген тапсырмаларынан осыны ұғындық. Әрине, отандық экономиканы өркендету үшін сан алуан қиындықтардың алдан шығары анық. Өйткені, біз өзімен өзі томаға-тұйық отырған ел емеспіз. Әлемнің көптеген елімен сауда-экономикалық, дипломатиялық, іскерлік байланыс орнаттық. Тіпті, елімізден әлемдік рынокқа бірнеше отандық өнім экспортталады. Әлемдегі дамыған елдердің экономикалық өркендеуін, әлемдік нарықтағы баға айырмашылығын мезгілінде сараптап, соған орай әрекет ету – бүгінгі нарықтың талабы. Міне, осы тұрғыдан айтқанда, теңгенің айырбас бағамын жасанды түрде ұстап тұру мүмкін емес. Бұл өзгеріс мұнай және мұнай өнімдерін, астық пен ет секілді қазақстандық тауарларды сыртқы рынокқа экспорттаушылар үшін өте тиімді болады екен. Қазақстанның экспортталатын тауарларынан ел бюджетіне түсетін қаржы көлемі де молаяды. Сонымен бірге, отандық экономиканың өсіміне оң ықпал етпек. Ал ішкі нарықтағы азық-түлік бағаларының бұған дейінгі тұрақты қалпын сақтайтындығына бір аптаның ішінде көзіміз жетті. Күнделікті тұтынатын азық-түліктер бағасының қалыпты деңгейден аспайтындығына кепілдік барлығын айтар болсақ, алдымен, еліміздегі астық қорының молдығына үміт артамыз. Бұрынғыдай емес, ауыл шаруашылығы өнімдері де өз елімізде молынан өңделеді. Тәуелсіз еліміз әлемнің дамыған 30 елінің қатарынан лайықты орнын алуға ұмтылып отыр. Төрткүл дүниеге бәсекеге қабілетті қуатты мемлекет ретінде танылған тәуелсіз Қазақстанымыздың экспорттық әлеуетін жаңа биіктерге көтеретін бұл шара алдымен ел экономикасын өркендету тұрғысынан қолға алынғанын сезініп отырмыз. Ендеше, бұл отандық экономиканың өркендеуіне, халықтың әлеуметтік ахуалын жақсартуына оң өзгеріс әкелетіндігіне сенімдімін. Өтеп НҰРИЕВ, Индер аудандық ардагерлер кеңесінің төрағасы. Атырау облысы.Ілгерілеудің ілкімді бағыттары
Елбасы Нұрсұлтан Назарбаев Үкіметтің кеңейтілген отырысында үстіміздегі жылғы Жолдаудың тапсырмалары мен «Қазақстан-2050» Стратегиясын орындаудың мәселелерін қарастырды. Үкіметтің кеңейтілген отырысында сөйлеген сөзінде Мемлекет басшысы бүгінгі күні әлемдік ахуалдың оңай еместігін, дағдарыстың салдары әлі аяқталмағанын атап өтті. Президент Н.Назарбаев «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауында «Күшті, қуатты мемлекеттер ғана ұзақ мерзімдік жоспарлаумен, тұрақты экономикалық өсумен айналысады... ХХІ ғасырда «жеңіл серуен» болмайды... Дамыған елдер өздерінің стратегияларын ХХІ ғасырға өлшеп-пішіп жатыр», деген сөздерінің терең ғылыми астары бар. Себебі, өндірістік қатынастардың өндіргіш күштердің даму деңгейіне сәйкес болуы объективті заңына орай, олардың арасында орын алатын диалектикалық қарама-қайшылықтар уақыт талабына сай кезең-кезеңмен шешіліп отырмаса, өндіргіш күштердің дамуына бөгет жасайтын тұсауға айналады, олардың шиеленісуі әлеуметтік-экономикалық прогрестің дағдарысына әкеліп соқтыруы мүмкін. Сондықтан, жоғарыда келтірілгендермен қатар, «Қазақстан-2050» Стратегиясы ХХІ ғасырдағы нөмірі 1 ереже болып табылады. Егер ел өзінің жүру бағдарын және жету айлағын білмесе, ешқандай жел ілеспе бола алмайды», деуінің ғылыми астарлы мағынасы бар. Елбасы әлемдік экономика мен қалыптасқан үрдісті ескере отырып, Үкімет пен Ұлттық банкке макроэкономикалық және әлеуметтік тұрақтылықты сақтау үшін жеті бағыттағы алдын алу шараларын іске асыруы керектігін еске салды. Халықтың табыс табуын қолдау, кәсіпкерлікті дамытуға ынталандыру, қаржы секторының тұрақтылығын арттыру, экономикаға мемлекеттің қатысуын азайту, «көлеңкелі экономиканы» қысқарту, инвестициялық ахуалды жақсарту, экономиканы әртараптандыру еліміздің ертеңгі жарқын болашағын айқындайтын арналар екені сөзсіз. Бұл міндеттерді жүзеге асыру арқылы ел экономикасының дамуына берік негіз қаланады. Мемлекеттің экономикаға қатысуын азайту арқылы өнеркәсіптің өркендеуіне қол жеткізіледі. Экономикалық ынтымақтастық және даму ұйымы стандарттарына сәйкес, жылма-жыл ІЖӨ-нің өсуін 4 пайызға, Экономиканың ғылыми сыйымдылығы жоғары моделін енгізе отырып, қазақстандық экспортта шикізаттық емес өнімдердің үлесін 70 пайызға көбейту міндеті қойылды. Бұл көрсеткіштердің өзіндік мәні бар. Халықаралық сарапшылардың пікірінше де осындай өсім тұрақты сапалық өсу деңгейін көрсетеді, ал қосылған құны жоғары дайын өнімдердің үлесін арттыру еліміздің ішкі нарығын, ұлттық валютамыздың тұрақтылығын қамтамасыз етеді, сонымен бірге, халықаралық рынокта бәсекелестік басымдыққа қол жеткізуге мүмкіндік береді. Елбасы ел дамуының көкжиектерін нақты көрсете отырып, болашаққа батыл болжамды қадамдар жасап отыр. Бұған біздің еліміздің мүмкіндігі мол. Тек Елбасы айқындаған бағыттарды баянды жүзеге асыруға баршамыз жұмылуымыз керек. Еңбек етемін дегендерге жұмыс та табылады, табыс көзі де бар. Үбайдолла МӘМБЕТОВ, Құдайберген Жұбанов атындағы Ақтөбе өңірлік мемлекеттік университеті құқық және экономика негіздері кафедрасының доценті. Ақтөбе.
