Форум сессияларының тақырыптары коронавирус пандемиясы кезінде бүкіл әлемде болып жатқан жеделдетілген цифрлы трансформация бағытына арналды.
Өзекті мәселелерді талқылауға ел Үкіметі, корпоративтік сектор, сарапшылар қауымдастығы өкілдері, цифрлы қызметтерді шетелдік әзірлеушілер, IT-компаниялардың басшылары және т.б. тұлғалар қатысты.
Форум сессиялары барысында «Ашық инновациялар мен жаңа цифрлық шындықтың міндеттері», «Цифрландыру және құқық: жаңа сынақтар», «Қазақстандық стартаптар сыртқы нарыққа қалай шығады?», «Аутсорсинг. Қазақстан», «Қазақстандық университеттер қалай жаңа технологиялық жобалардың пайда болу алаңына айналуы мүмкін?» деген тақырыптар талқыланды.
Форум кезінде Нұрсұлтан Назарбаев қоры ұйымдастырған KazRoboProject-2021 роботтехника байқауында және Smart Zholy хакатонында жеңімпаз болғандардың есімі анықталды. Бұл форумның маңызды бөлімі болды. Жыл сайын роботтехника бойынша чемпионат (10 жастан 21 жасқа дейінгі жастар арасында өткізіледі) еліміздің барлық аймақтарынан ондаған жас өнертапқыштарды анықтайды. Smart Zholy бағдарламасы перспективалы IT-стартаптарды қолдауға, олардың үздіктерін халықаралық деңгейге шығаруға бағытталған. Бағдарлама жеңімпаздары бірнеше жылдан бері Сингапурдегі Оңтүстік-Шығыс Азиядағы ең ірі стартап алаңында өз жобаларын ұсынып келеді.
KazRoboProject-2021 байқауының «Концепт» номинациясы бойынша 10 жастан 15 жасқа дейін – Trashbot жобасы бар Jylyoi tehnik командасы үздік деп танылды. Бұл судағы қоқысты жинауға арналған құрылғы. Ол жүзіп жүріп контейнерде пластмассаны және басқа қалқымалы қоқыстарды жинайды. Бұл модельде процесті автоматтандыру элементтері, датчиктер мен ақпаратты беру құрылғылары бар. Ал 16 мен 21 жас аралығында – Eco-Robot жобасы бойынша Team Atom командасы таңдалды. Бұл робот қала көшелеріндегі қоқысты офлайн режімде және камера мен интернетті қолдана отырып басқару арқылы жояды. «Прототип» номинациясы бойынша 10-15 жас аралығында – «Ақылды Terminal» жобасын дайындаған Smart-TOP командасы жеңіске жетті. Олар мекеменің кіре берісіне орналастыруға болатын, дене температурасын өлшейтін, антисептикалық заттар шашатын және келушілерге маска тарататын терминал ойлап тапты. 16 мен 21 жас аралығында «Кванториум» командасы жеңімпаз ретінде танылды. Бұл команда 18 650 аккумуляторды автоматты түрде зарядтауға арналған станса ойлап тапты. Павлодар колледжінің жоғары курс студенттері батареяларды үлкен көлемде үздіксіз зарядтауға арналған толық автоматтандырылған кешен әзірледі. Батареялар құрылғыға контейнерден жеткізіледі. Батареяның зарядтауға жарамдылығы мен полярлығы тексеріледі.
Smart Zholy хакатонына қатысушыларға Қазақстан Республикасы Президенті Іс басқармасында ішкі процестердің тиімділігін арттыру үшін жаңа цифрлы шешімдерді құру тапсырмасы жүктелген болатын. Атап айтқанда, бұл мобильді қосымшалар, заманауи технологиялар арқылы қолданатын бағдарламалық шешімдер болуы мүмкін еді.
Хакатонға 35-тен астам қатысушы өтінім жіберді. Олардың арасынан 5 команда шешуші кезеңге өтті. Smart Zholy байқауының нәтижесінде «Automatico командасы» жеңімпаз атанды. Команда транспорт саласы үшін процестерді автоматтандыру мен алмастырудың тиімді шешімін құрды.
