Алмағайып тарих толқынында ғасыр бойы халқымен қоса жасасып, ел шежіресін қаттаған “Егемен Қазақстан” газетінің 90 жылдық торқалы тойы өткен жылы кең көлемде аталып өтті. Ел газетінің айтулы мерекесіне Елбасы Нұрсұлтан Назарбаев арнайы келіп, Астана қаласында бой көтерген басылымның жаңа ғимаратының тұсауын кесті. Міне, осы бір мерейлі мереке күндерінде Астана қаласының әкімдігі мен қалалық мәслихаты ұлттық басылымның байрағын асқақтатып, Алматы ауданындағы бұрынғы М.Ломоносов атындағы көшеге “Егемен Қазақстан” газеті” көшесі деген атау беріп, арнайы шешім қабылдады. Газетімізге деген осындай шынайы құрмет үшін Астана қаласының әкіміне, қалалық мәслихаттың депутаттарына, қалалық Ономастика комиссиясына, бұрынғы М.Ломоносов атындағы көшенің тұрғындарына алғыс білдіреміз.
Солай бола тұрса да, бүгінде редакциямызға күн құрғатпай оқырмандардан түсіп жататын хат-хабарлардың басым көпшілігі ескі мекен-жай бойынша келеді. Әрине, жаңа атаудың тез де жылдам сіңісті болып кетуі үшін уақыт та керек шығар. Дегенмен, газетіміздің жанашырлары мен жалпы оқырман қауымның жаңа мекен-жайды білгені-ақ дұрыс. Осыған байланысты редакциямыздың бүгінгі мекен-жайы: 010008. Астана қаласы, “Егемен Қазақстан” газеті” көшесі, 5/13 екендігін оқырмандарымыздың есіне саламыз.
Сөз орайы келгенде еске салар тағы бір жәйт, көше атауы өзгергенімен, редакция ғимаратының қос бетіндегі, Абай даңғылындағы (М.Ломоносов), Кенесары көшесіндегі (Жуковка) атты аялдамалардың атаулары әлі өзгерген жоқ. Бұл “Егемен Қазақстан” газеті редакциясының мекен-жайын іздейтін жұртшылыққа айтарлықтай қиындықтар тудыруда. Алдағы уақытта қала әкімдігі және қалалық жолаушылар тасымалдау департаменті бұл мәселені ескерер деген сенімдеміз. Автобус жүргізушілері: “Келесі аялдама — “Егемен Қазақстан”, деп хабарлап жатса қандай жарасымды!