Ал індет қайдан тарайды дейміз? Қоғамдық көліктерде күрк-күрк жөтелгендерге сезіктене әрі қорқып қарайсыз. Жүргізушілер де бетпердесіз. Бақылау да, тексеру де жоқ деуге болар.Тіпті зарарсыздандыратын сұйықтықсыз бос қалған құтылар әбден ескіріп, ішке кіре берер жерде ілініп тұрады.
Облыстық санитарлық-эпидемиялық бақылау департаментінің өкілі Ғизат Әбішевтің мәліметінше, өңірдегі эпидемиялық ахуал әлі де тұрақсыз. Қазірге дейін облыста коронавирусты жұқтырудың 50 844 мың жағдайы тіркелді. Олардың 41 530-ы симптомды, 9 314-і – симптомсыз. Осыған орай енді Ashyq жүйесі бойынша жұмыс істейтін нысандардың жұмысына өзгеріс енгізілуде.
– 29 қазаннан бастап 12 қарашаға дейін Ashyq арқылы жұмыс істейтін нысандарға жұмыс күндері тек «жасыл» мәртебесі бар адамдар кіре алады, – дейді Ғизат Әбішев. – Жеті күннен аспаған ПТР-тестінің нәтижесі теріс және вакциналаудан өткендер өте алады.
Бұдан бөлек, ауыл-қала тұрғындарының карантиндік режімді жиі бұзуы алаңдатуда. Шектеулерге қарамастан сауда үйлеріне, дәмханаларға, Ashyq бағдарламасы орнатылған орындарға баруда. Мысалы, департамент өкілі ұсынған 26 қазандағы мәліметке сай, өңірдегі 337 нысанға 2 мыңға жуық тұрғын, «қызыл» тіркеуіндегі
1 400, «сары» белгісіндегі 600-дей тұрғын жіберілген жоқ.
Қазір барлық қалалар мен аудандарда 24 мониторингтік топ жұмыс істейді. Екібастұз қаласында 10 айдың ішінде карантиндік талаптарды бұзған 96 адам анықталған. Осы қазан айында 85 рейд жүргізіліп, 279 бизнес нысанына карантин талаптарын сақтап, індет таратпау жайындағы түсініктемелер тапсырылған. Қалада 1 236 бизнес нысаны Ashyq жүйесіне тіркелген. Сондықтан, өңірде бас санитар дәрігердің шешімімен жаңа талаптар енгізілді. Яғни эпидемиялық ахуалдың тұрақсыздығы, індет жұқтырған науқастардың көбеюі жаңа талаптар қабылдауға мәжбүр еткені белгілі. Енді 29 қазан мен 12 қараша аралығында Ashyq жобасына қатысушы нысандардың күнделікті жұмысына толықтырулармен бірге, өзгерістер де енгізіледі.
Бүгінде облыс көлемінде 6 830 әлеуметтік және бизнес нысаны Ashyq бойынша жұмыс істейді. Жалпы есеп бойынша «қызыл» статусы бар 2 мың адам Ashyq бойынша кері қайтарылған. Ashyq жобасын бұзушылар Павлодар, Екібастұз және Ақсу қалаларында анықталған. Өңір бойынша, 18 мамыр мен 26 қазан аралығында мониторингтік топтар 3 274 нысанның 114-іне шектеу шараларын бұзу фактісін анықтады. Олардың барлығы Ashyq жобасының қатысушылары болған. Жалпы, жобаға 2,5 мыңға жуық қатысушы анықталды, олардың 467-сі мемлекеттік мекемелер. Мониторингтік топтардың мүшелері Ashyq жобасының қатысушыларымен түсіндіру жұмыстарын жүргізуде.
Тәртіп бұзушыларға әкімшілік құқық бұзу жөніндегі заң талаптары бойынша құны 8 млн теңгеден астам 63 әкімшілік құқық бұзушылық туралы хаттама толтырылса, қалғаны сотқа жолданған.
Облыстық санитарлық-эпидемиялық бақылау департаментінің мәліметінше, қазан айының соңғы күндері өңірде індет жұқтырған 49 331 науқас тіркелсе, 27 035 науқас облыс орталығының тұрғындары. Эпидемиологтердің бағалауынша, індет инфекциясы бойынша өңірде жағдай әлі тұрақсыз.
Павлодар облысы
