Тілдерді дамыту басқармасының бас маманы Бақытгүл Сүлейменованың айтуынша, аталған шараны өткізудегі басты мақсат – Ыбырай шығармалары арқылы өңір жастарының көркемсөз оқу шеберлігін, сөйлеу мәдениетін жетілдіру. Сондай-ақ әдебиет пен өнерге құштар дарынды жастарды ынталандыру.
Байқау барысында үміткерлер үш кезең бойынша білімдерін сынап көрді. «Менің пірім – Ыбырай» атты бірінші кезеңде қатысушылар ұлы ағартушыға арнаған арнау өлеңдерін оқыды. Одан кейін экрандағы ұяшықтарды таңдау арқылы Ыбырай Алтынсариннің соңғы үлгідегі латын графикасына түсірілген шығармасынан үзінді оқып берді. Ал үшінші кезеңге өткендер Ыбырай атамыздың өлеңдерін көркем тілмен мәнерлеп оқып шықты.
Байқау қорытындысы бойынша «Менің пірім – Ыбырай» аталымын Қостанай қаласының №14 мектебінің мұғалімі А.Аманбаева, «Алтынсарин мұрасының білгірі» аталымын Арқалықтағы №2 әмбебап ғылыми кітапханасының қызметкері Е.Әуезхан, «Ыбырайды оқимын да тоқимын» аталымын Меңдіқара аудандық тілдерді оқыту орталығының оқытушысы И.Мусинов жеңіп алды. Сондай-ақ қазылар алқасының шешімімен Арқалық қаласы Б.Майлин атындағы №3 мектептің мұғалімі А.Сәлімжан бірінші орынды, Қостанайдағы Ыбырай Алтынсарин мемориалдық музейінің бөлім меңгерушісі С.Мырзабай екінші орынды иеленсе, Сарыкөл ауданының Урицк мектеп-лицейінің мұғалімі Е.Өміртай жүлделі үшінші орынды қанағат тұтты.
Қостанай облысы
