Қалың қара түтін бейнеленген видео Instagram-да жарияланды.
Жамбыл ауданының әкімдігі хабарлағандай, «Амангелді ГӨЗ» ЖШС Тараз филиалының аумағындағы өрт туралы ақпарат сағат 12:00-де келіп түсті.
«Көрсетілген уақытта компаундирлеу блогының учаскесінде көлемі 240 текше метр екі дизель резервуары жанғаны анықталды», деп жазады Жамбыл ауданы әкімдігінің баспасөз қызметі.
Өртті сөндіруге облыстық ТЖД жеке құрамынан 75 адам және 21 техника жұмылдырылды.
«Өрт 12:54-те ауыздықталды, қаза болғандар мен зардап шеккендер жоқ. Өрттің шығу себебі анықталуда», дейді әкімдіктің баспасөз қызметі.
Ведомство зауыт аумағы қоршалып, кәсіпорын қызметкерлері эвакуацияланғанын атап өтті.
Өз кезегінде облыстық төтенше жағдайлар департаменті өрт 13:17-де жойылғанын хабарлады.
«Жалпы көлемі 480 текше метр дизельді отыны бар екі резервуар жанып кетті. Зардап шеккендер туралы ақпарат жоқ. Алдын ала себеп – мұнай өнімдерін айдау кезінде технологиялық процестің бұзылуы», деп мәлімдеді Жамбыл облысы ТЖД баспасөз қызметі.
