Қазақстан • 29 Қазан, 2021

«Астана LRT» экс-басшысына халықаралық іздестіру жарияланды

129 рет көрсетілді

«Астана LRT» экс-басшысы Талғат Ардан Түркиядан іздестірілуде. Бұл туралы Бас прокурор Ғизат Нұрдәулетовтің Мәжіліс депутаттарының сауалына берген жауабында айтылған, деп хабарлайды Egemen.kz.

Жарияланған құжатқа сәйкес, сыбайлас жемқорлыққа қарсы қызметтің сұрауы бойынша іздестіріліп жатқан Талғат Ардан мен Қанат Сұлтанбековке ҚР ІІМ Интерпол арналары бойынша халықаралық іздестіру жарияланды.

«Талғат Арданның Түрік Республикасының аумағында болуы туралы қолда бар ақпаратқа байланысты аталған құзыретті органдарға оны мемлекетке беру туралы сұрау жіберілді. 15 сәуірде Түркияның Интерполынан Стамбул қаласы Бакыркей ауданының қылмыстық соты ұстап беру туралы сұрау салу негізінде Ардан Талғатты қамауға алу туралы қаулы шығарғаны туралы ақпарат келіп түсті. Қазіргі уақытта іздестірілушіні Түркия аумағында анықтау және ұстау бойынша іс-шаралар жүргізілуде», делінген жауапта.

Сонымен қатар, хабарламада Қанат Сұлтанбековты іздеу туралы да айтылған.

«Сондай-ақ, Сұлтанбековтің АҚШ аумағында болуына байланысты АҚШ әділет Министрлігіне оны Қазақстанға тапсыру туралы сұрау жіберілді. Сауал америкалық тараптың қарауында жатыр», деді Ғизат Нұрдәулетов.

Еске сала кетсек, тергеу барысында анықталған залал сомасы 5,8 миллиард теңгені құрады.

«Тергеу барысында іс бойынша 45 млн теңге өтелді. Өткізілген іс-шараларда бағалау құны 3,08 млрд теңге болатын Қ. Сұлтанбековтың атына тіркелген мүлік анықталды. Аталған мүлікке тергеу сотының 22.01.2020 жылғы қаулысы бойынша тыйым салынды. Ал Т. Арданда тыйым салынатын және тәркіленетін мүлік табылған жоқ», делінген хабарламада.

Қаржы мониторингі агенттігінің мәліметінше, аталған тұлғалар мен олардың жақындарынан, оның ішінде басқа елдерден қандай да бір активтер табылған жоқ.

Еске сала кетсек, 2021 жылғы 28 мамырда Нұр-Сұлтанда «Астана LRT»-дегі ұрлық туралы іске нүкте қойылды.

«Астана LRT» компаниясымен жұмыс істеген жеті экс-шенеунік пен компания қызметкерлері 7 жылдан 10 жылға дейінгі мерзімге сотталды. Ал «Астана LRT» ЖШС-нің бұрынғы басқарма төрағасы Талғат Ардан мен елорда әкімінің бұрынғы орынбасарына халықаралық іздеу жарияланды.

Соңғы жаңалықтар

Айбергенов күнделігі

Әдебиет • Кеше

Кофе және әдебиет - 6

Әдебиет • Кеше

Жасанды интеллект дәуірі

Технология • Кеше

Ұқсас жаңалықтар