Деректерге көз жүгіртсек, індеттің жайылып келе жатқандығын аңғаруға болады. Мәселен, өткен аптада COVID-19 жұқтырған 945 жағдай тіркеліп, індетке шалдығушылар саны 1,03 есе өскен. Тиісті орындар сақтандыру жолдарын айтып, алдын алу шараларын жүргізіп жатырмыз дегенімен, әзірге жағдайдың оңала алмай тұрғаны анық. Енді талапты қатайтпаса болмайтын түрі бар.
Ashyq жобасына қатысушыларды есептемегенде, әрқилы салтанаттарды, еске алу, отбасылық іс-шараларды өткізуге тыйым салынады. Біз осы арада карантин талаптарын бұзғандарға қатаң шара қолдану керек екенін айтқымыз келеді. Әйтпесе, дерттің зардабынан қорқып айылын жиып отырғандар аз. Бұл жайды өткен жолы да жазып, елдің еті өліп кеткенін айтқан болатынбыз. Мобильдік топтар тәртіп бұзушыларды анықтап, әкімшілік айыппұл салып жатқанымен, облыс орталығындағы аудандарда да жүздеген адам жинап, той-томалақ өткізу, бата беру тыйылған жоқ. Осыншама адамның ішінде бірді-екілі дертті адам болса, ондаған, тіпті жүздеген адамның індет жұқтырып алуы оп-оңай. Адамдардың сақтық шараларын ескермей, қатерге басын тігіп, неліктен тәуекел ететіні түсініксіз. Мейрамхана мен дәмхана иелері «қызыл аймақтағы» қауіптің үстемдік құрып тұрғанын жақсы білсе де, өздерінің қарақан басының қамын ойлап, рұқсат беруі де қисынға келмейді. Демек карантиндік тәртіп бұзғандарға салынатын айыппұл көлемін өсіру керек шығар. Бәлкім сонда ғана аяғын тарта басуы мүмкін.
Облыстың бас мемлекеттік санитарлық дәрігері Айнагүл Мусинаның айтуына қарағанда, өңірде (Sputnik V, QazVac, CoronaVac, Sinofarm (XayatVax + VeroCell) вакциналары қолжетімді. Сөз арасында күні бүгінге дейін вакцинаның бірінші компонентімен 296 071 адам егілгенін айта кетелік. Бұл – егілуге тиісті халықтың 61,8 пайызы. Ал екінші компонент бойынша 270 761 адам егіліп үлгерген. Бұл көрсеткіш жалпы халықтың 36,8 пайызын құрайды. Осы арада жұмысты әлі де ширата түсу керек екенін айта кету парыз. Ұжымдық иммунитетті қалыптастыру үшін халықтың кем дегенде 60 пайызын қамту қажет екені белгілі. Міне, осындай көрсеткішке қол жеткізгенде ғана карантиндік шараларды сәл босаңсытуға болар.
– Облыс бойынша 296 071 екпе салдырған адамның 231-і
ғана індет шеңгеліне ілінді, – дейді Айнагүл Мусина, – мұндай жағдайдың орын алуы жалған төлқұжат жасатудың салдары болуы әбден мүмкін.
Жалған төлқұжаттың жұртшылыққа тигізер зардабы көп екені туралы аз айтылып жүрген жоқ. Дәлелденген кезде жалған вакцина жасағандар қылмыстық жауапкершілікке тартылатыны да белгілі. Біле тұрып осындай қадамға барғандарды қалай кешіруге болады. Бір адамның ғана денсаулығына нұқсан келіп қоймай, жалпы халыққа қауіп төндіруге жол беріп отырғандарды жазалау қатайтылса, мұндай қасақана тәртіп бұзу азаяр ма еді.
Өңірде ревакцинация қараша айының үшінші онкүндігінен басталады. Алдымен тәуекелді топтар қамтылмақ. Вакцинаның бір дозасы қайта вакциналау үшін қолданылады. Қосымша дозаны енгізу толық курс аяқталғаннан кейін 6-9 айдан кейін ұсынылады.
Қолда бар деректерді ақыл таразысына салып сараптасаңыз, індеттің өршіп тұрғанына алдымен өзіміз кінәлі екеніміз айдан анық. Халықтың бәрі төтеннен келген дерттің қарқынын төмендету үшін алдымен өзі сақтанса, өзге де аман болар еді. Бір әттеген-айы, жалқының ғана емес жалпының жайын ойлау кемшін.
Ақмола облысы
