Коронавирус дағдарысынан кейін кәсіпкерлік саласы қайтадан жандана бастады. Бір жылдың ішінде шағын және орта бизнесте өнім шығару бірден 25%-ға өскен, деп хабарлайды finprom.kz. Шығарылған өнімнің көп бөлігі шағын кәсіпкерлікке тиесілі. Осы салаларда жүмыспен қамтылғандар да көп.
Шағын және орта бизнес субьектілері шығарған өнім көлемі былтырғы қысқарту кезеңінен кейін 25,4%-ға күрт артып, 2021 жылдың қаңтар-маусым аралығында 17,5 трлн теңгені құраған. Сектордағы жылдық өсім еліміздің барлық өңірінде байқалды деуге болады. Ең төменгі өсім Павлодар облысында болса да мұндағы ШОБ-тың өнім шығару үлесі 9,8%-ды құраған. Ал ең жоғары көрсеткіш Түркістан облысында – 65,9%. Қазақстанның тек Маңғыстау облысының көрсеткіші ғана былтырғымен салыстырғанда 5,2%-ға төмендеген.
Шағын және орта кәсіпкерлік субъектілері өнімінің жартысына жуығы Алматы (4,5 трлн теңге) және Нұр-Сұлтан қаласында (4 трлн теңге) өндірілген. Өнімдердің 70,6%-ы немесе 12,4 трлн теңге тікелей шағын бизнеске тиесілі. Орта бизнесте 19,6% немесе 3,4 трлн теңгенің өнімі шығарылған. Жеке кәсіпкерлерге – 8,3% немесе 1,4 трлн теңге, шаруа қожалықтарының үлесі – 1,5% немесе 266,5 млрд теңге.
Барлық шағын және орта кәсіпкерлік субъектісінің үштен екісі жеке кәсіпкерлерге тиесілі – 62,8%, шағын бизнеске – 21,1%, шаруа қожалықтарына – 15,9%, орта бизнеске – 0,2%.
Сонымен қатар салада жұмыс істейтіндердің 41,5%-ы – шағын бизнесте. Одан кейінгі тізімде жеке кәсіпкерлер тұр: осы сектордағы жұмыспен қамтылғандардың үлесі – 39,3%, орта бизнес саласына қатысты компанияларда еңбек ететіндер – 10,3%, шаруа қожалықтарында 8,9% кәсіпкер жұмыс істейді.
Кәсіпкерлік саланың қайта жандануына мемлекеттік қолдаулар да ықпал етіп отыр, дейді сарапшылар. Ұлттық экономика министрлігінің мәліметінше, биыл да шағын және орта бизнесті жеңілдікпен несиелендіру жұмыстары жалғасып жатыр. Осы жылдың бірінші тоқсанында 663 млрд теңге сомасына 16 мыңнан астам жоба жеңілдетілген несиемен қаржы алған. Жыл қорытындысы бойынша 2,5 трлн теңгенің жеңілдетілген несиесі 47 мыңнан астам жобаға беріледі деген жоспар бар.
Экономиканың зардап шеккен салаларындағы шағын және орта бизнес кредиттерін қайта қаржыландыру жұмысы да тоқтаған жоқ. 2020 жылдың 15 наурызы мен 2021 жылдың 15 наурызы аралығында 475 млрд теңге сомасына 9 мыңға жуық жобаны қайта қаржыландыру үшін субсидиялар берілген. Биыл субсидия бөлінетін салалар көбейе түскен. Кеңейтілген тізбе бойынша жыл соңына дейін субсидиялар 132 млрд теңге кредиттік порфель сомасы бойынша 2 мың жобаға төленеді.
