Нина ЖҮСІПОВА, «Қазкоммерцбанк» басқарма төрайымы: «Отандық банк жүйесінде жақсы сақтандырылған механизм жұмыс істеп тұр»

Еліміздің банк жүйесі талай қиын кезеңді басынан өткерген. Атап айтсақ, әлемдік нарықтағы тұрақсыздықтар, ғаламдық эконо­микалық дағдарыс, сондай-ақ, валюта бағамының ойнақылығы секілді жағдайлар. Енді осындай қилы кезеңді басынан өткеріп, осы күнге дейін табысты жұмыс істеп тұрған банктер бір-ақ күнде банкрот болып, өз жұмысын тоқтатады дегенге қалай сенесіз?! Ел ішінде нендей алыпқашты әңгіме жүрмесін, мейлі мүдделі топтар түрлі әрекеттерге барса да Қазкоммерцбанк бұрынғыша, дағдылы жұмыс режімімен халыққа қызметін көрсетіп отыр. Бізде несиемен жұмыс істеу, жеке тұлғалардың салымы, төлем карталары мен банкоматтық жүйеде еш кедергі жоқ және шұбатылған кезекті де көрмейсіз. Осы ретте мен жеке салымшыларға әуелі өз есепшотыңыздағы жинақ­талған қаржыны біржолата қай­тарып алмас бұрын, банк қызметкерлерімен немесе бө­лім­ше басшыларымен сөй­ле­сіп, ақылдасыңыздар дегім ке­леді. Бұл тек біздің банктің клиенттеріне ғана айтылған сөз емес, отандық барлық банк салым­шыларына бағытталған кеңес. Олай дейтінім, негізсіз алып­қашты әңгімеге сеніп салым­шылар бірнеше рет шығынға ұшырағанын өздері де байқамай жатады. Барша отандастарымыз ескерер бір мәселе бар, ол – бізде, Қазақстанда салымшылардың қаражатын қорғау ниетімен жасалған мызғымас механизмнің жұмыс істеп тұрғанын ұмыт­пайық. Біздегі барлық банктер мін­­детті ұжымдастырылған сақ­­тандыру жүйесінің мүше­лері және жергілікті салым­шы­лар­дың қаржысы толық қам­сыз­дан­дырылған. Бұл дегеніңіз, банк­ке салған ұлттық валюта да, шетелдік валюта да өз құнын толық сақтап тұрады деген сөз. Біздің елімізде отыздан аса әр деңгейдегі банктер жұмыс істейді. Олардың ішінде кейбір жекелегендері ұзақ уақыттан бері ел сеніміне жақсы орныққандар. Міне, біз үнемі өз клиенттерімізге егер қаржы мәселесінде кү­ман­данар болсаңыз, бірнеше банк­тен өз есепшотыңызды ашып, әртүрлі валюта түрінде сақтап көріңіз деп айтамыз. Қазкоммерцбанк елдегі өзге банктер сияқты үнемі ұлттық валютаны өз деңгейінде ұстап тұруға күш салады. Және де теңге баға­мына қатысты мәселелерде салым­шылардың есебі түгел болуына мүдделі екендігімізді ескерткім келеді. Жазып алған Қанат ЕСКЕНДІР, «Егемен Қазақстан». АЛМАТЫ.