Ғылым жетістіктері –Экономикада

Кеше Парламент Сенатының Әлеуметтік-мәдени даму және ғылым комитеті Қазақстан ұлттық жаратылыстану ғылымдары академиясымен бірлесіп, «Қазақстан-2050» Стратегиясын іске асыру аясында «Ғылыми зерттеулердің тиімділігін құқықтық қамтамасыз етуді жетілдіру шаралары және олардың нәтижелерін еліміздің әлеуметтік-экономикалық жаңғырту үдерістеріне енгізу» тақырыбында дөңгелек үстел өткізді. Шараға Парламент депутаттары, салалық министрліктер мен мекемелер, ғылыми орта және оқу орындарының өкілдері қатысты. Дөңгелек үстел отырысының алдында қатысушылар ғылыми-техникалық көрмені тамашалады. Онда қатысушыларға еліміз ғылымының жетістіктері, ғалым­дарымыздың жаңа технологиялық жобалары мен технологиялық шешімдері, сондай-ақ, өндірістік орталарға инновация енгізудің іс жүзіндегі нәтижелері көрсетілді. Дөңгелек үстелді Әлеуметтік-мәдени даму және ғылым коми­тетінің төрағасы Ақан Бижанов ашып, жүргізіп отырды. Отырыста Қазақстан ұлттық жаратылыстану ғылымдары академиясының пре­зиденті Нұртай Әбіқаев қаты­су­шыларға арнап сөз сөйледі. Ол Мемлекет басшысының «Қа­зақ­стан-2050» Стратегиясы аясында алға қойылған міндеттердің Қа­зақстан ғылымын дамытудағы маңызын айта келіп, венчурлық қаржыландыру, зияткерлік меншікті қорғау, зерттеулер мен инновацияны қолдау тетіктерін жетілдірудің заңнамалық аспектілері және ғы­лыми жаңалықтарды коммер­ция­ландыру Президент Н.Ә.Назар­баевтың Жолдауын іске асырудың Жалпыұлттық жоспарына енгі­зілгенін атап өтті. Өзінің сөзінде жиналыс төра­ғасы А.Бижанов еліміздің ғылыми әлеуетін нығайту, ғылымға не­гізделген экономикаға көшу орнық­ты экономикалық дамуға және Қа­зақстанның әлемдік нарықтағы бәсекеге қабілеттілігін қамтамасыз етуге, сондай-ақ әлеуметтік-эконо­микалық жаңғыртудың ауқым­ды мәселелерін шешуге ықпал ететінін атап өтті. Осыған байланысты сенатор Мемлекет басшы­сының Жолдауында ғылымды дамытуға, оның ішінде саланы қаржыландыруды ІЖӨ-нің қазіргі 0,28 пайызынан 3 пайызға дейін көтеру арқылы ерекше көңіл бөлініп отырғанын жеткізді. Дөңгелек үстелде негізгі баян­даманы Білім және ғылым министрі Аслан Сәрінжіпов жасады. Ол Президент Жолдауындағы мін­дет­терден туындайтын министрліктің жұмыс жоспары туралы айтты. Министрлік жұмысы ғылым мен инновациялық дамуды үйлестіруге, мамандар әлеуетінің бәсекеге қабілеттілігін арттыруға, ғылым инфрақұрылымын жаң­ғыртуға және одан әрі дамы­туға бағытталатыны аталды. А.Сәрінжіповтің айтуынша, бұл жоспар ғылымның экономика мен инновацияға іс жүзінде араласуын қамтамасыз ету мақсатында ғылымдағы реформаларды терең­детуді көздейді. Ол үшін ми­нистрлік «Ғылым туралы» және ғылым саласындағы нормативтік-құқықтық қосымша актілерге өзгерістер мен толықтырулар енгізуді ұсынды. Олар ғылыми қызмет нәтижелері айналымын ынталандыруда құқықтық реттеудің кемшіліктерін кешенді түрде жоюға және экономиканың нақты секторына енгізуге бағытталған, деді министр. Ғылымды одан әрі дамытудың келешегі, онда өндіріс пен биз­нес­тің ықпалдасуы, ғылыми қыз­мет­тің коммерциялануы, ғылыми зерт­теулердің тиімділігін арттыру мәселелері басқа да қаты­сушылардың сөздерінде айтылды. Дөңгелек үстелдің қоры­тын­дысы бойынша ұсыныстар әзірленіп, ол тиісті мемлекеттік органдардың алдағы жұмыстары үшін жіберілетін болды. Жақсыбай САМРАТ, «Егемен Қазақстан».