Мәселен, қазан айында ұлттық павильонды Премьер-Министр Асқар Мамин арнайы келіп аралады. Бұдан бөлек, Халықаралық көрмелер бюросының бас хатшысы Димитрий Керкентзес өз бағасын берді. Сондай-ақ Біріккен Араб Әмірліктерінің жоғары лауазымды министрлері, көрмеге қатысушы елдердің елшілері мен бас комиссарлары да ұлттық павильонға қонақ болып қайтты.
Бұған дейін жазғанымыздай, Қазақстан павильоны 2021 жылдың 1 қазанында ресми түрде ашылған болатын. Дәл сол күні павильонды Дубайдың билеушісі, Біріккен Араб Әмірліктерінің вице-президенті Мұхаммед ибн Рашид Әл-Мактум мен Дубайдың мұрагер ханзадасы Хамдан ибн Мұхаммед Әл-Мактум, ЭКСПО-2020 көрмесінің бас директоры Рим әл-Хашими алғашқылардың бірі болып аралап, жұмысына сәттілік тіледі. Сол күні кешке павильонға Татарстан Республикасының президенті Рустам Миннихановтың да арнайы келгенін атап өткен жөн.
QazExpoCongress ұлттық компаниясының хабарлауынша, қазан айында павильонда мазмұнды іскерлік әрі мәдени бағдарламалар ұсынылған. Атап айтқанда, 3 қазанда ЭКСПО-ның климат және биоалуандық тақырыптық апталығы аясында Kazakhstan Green Day іскерлік іс-шаралар сериясы өтті. Оны Халықаралық жасыл технологиялар және инвестициялық жобалар ұйымы ұйымдастырған. Бұған қоса «Қазстандарт» кәсіпорны араб серіктестерімен бірқатар іскерлік кездесу өткізген.
«11-14 қазан аралығында шетелдік және қазақстандық суретшілердің қатысуымен Sal-Seri галереясының «Өркендеу сызықтары» көрмесінің вернисажы өтті. Онда бейнелеу өнеріндегі жаңа бағыттар ұсынылды.
Сонымен қатар 24-28 қазанда павильонда Қазақстанның туризм күндері ұйымдастырылды. Оның аясында панельдік сессиялар, іскерлік кездесулер, мәдени іс-шаралар өтті. Атап айтқанда, «Сазген сазы» фольклорлық-этнографиялық ансамблі өнер көрсетіп, MarinoMadi брендінің фэшн көрсетілімі көпшілік назарына ұсынылды. 1 қарашада Біріккен Араб Әмірліктерінің іскер қауымы Nur-Sultan Investment and Tourism Forum форумына жиналды», деп хабарлады QazExpoCongress.
Павильон медиа тұлғалардың да қызығушылығын тудырып отыр. Миллиондаған жазылушысы бар танымал блогерлер павильоннан алған әсерін әлеуметтік желі арқылы бөліскен. Осы орайда ұлттық павильонның ішінен ашылған Qazaq Gourmet мейрамханасы да келушілерді таңдаулы әрі таңсық ұлттық тағамдар мәзірімен таңғалдыруда.
Павильонның ішкі мазмұны еліміздің туристік және инвестициялық әлеуетін паш етеді. Сондай-ақ ол халықаралық көрменің «Ақыл-ойды біріктіре отырып, болашақты қалыптастыру» тақырыбымен толық үндесіп жатыр. Келушілер табиғатпен, тарихпен, мәдениетпен, дәстүрмен тыныстап, ел дамуының әлеуетті жобаларымен танысады. Әсіресе, көпшілік арасында «Роботтың қолы» аталып кеткен финалдық шоу талайдың таңдайын қақтыруда. Мұндағы адам мен жасанды интеллектің өзара әрекеті жұртшылықты бірден баурап алады.
Қазақстанның ЕХРО-2020 көрмесіне қатысудағы негізгі мақсаттың бірі – ел экономикасына тікелей және жанама инвестициялар тарту. Бұл ретте ұлттық павильонда 30-ға жуық іскерлік іс-шара өткізу жоспарланған.
Еске сала кетейік, дүниежүзілік EXPO-2020 көрмесі 2021 жылдың 1 қазаны мен 2022 жылдың 31 наурызы аралығында өтеді. Негізі бұл шара былтыр ұйымдастырылуы керек еді. Алайда коронавирус пандемиясына байланысты оның мерзімі шегерілді. Көрмеге әлемнің 192 елі қатысуда. Оны шамамен 25 млн адам тамашалайды деп күтілуде.
