Көптеген ауылда жергілікті тұрғындардың көмегімен баспанаға мұқтаж жандарға үйлер салынып, пайдалануға берілді. Ел Тәуелсіздігінің 30 жылдығына орай, Байзақ ауданы, Жаңатұрмыс ауылдық округіне қарасты Көкбастау елді мекенінде де аз қамтылған, көпбалалы Әліпбековтер отбасы баспаналы болды.
Аудан әкімінің орынбасары Дәуір Дәулетовтің айтуынша, «Асарлатып үй салу» жобасының мәні мен мазмұны айрықша. Бұл бастама ел-жұртты бірлік пен ынтымаққа ұйыстыруда, жарасымды татулықты насихаттауда, мұқтаж жандарды баспанамен қамтуда өз жемісін беріп келе жатқанын айтты. «Биыл аудан бойынша 18 ауылдық округте жағдайы төмен отбасыларына баспана салып беру қолға алынған болатын. Жыл басынан бері Аймантөбе және Кеңес ауылдарында қамқорлықты қажет ететін отбасыларына жаңа баспана берілді», дейді ол. Ал Әліпбековтер отбасының баспаналы болуына тұрғындар мен жастар, еріктілер мен демеушілер қолдау көрсетіпті. Ауылдықтар баспана қуанышына ортақтасып, өздерінің игі тілектерін жеткізді. Өз сөзінде Көкбастау ауылы ардагерлер кеңесінің төрағасы Әбдібек Байділдаев мұндай игілікті істің кейінгі жастарға да үлгі болатынын айтса, жаңа үйдің иесі Нұржан Әліпбеков пен ағасы Сәрсен Әліпбеков те игі іске атсалысқан барша азаматтарға алғыс білдірді.
Жамбыл облысы
