Бір отбасындағы келеңсіз жағдайлар арқылы бүгінгі қоғамның қасіретін көрсеткен қойылым түйсіксіздің өзіне ой түйгізуі бек мүмкін. Әртістер адам мен қоғам, тұлға мен тобыр тартысқан заманның шындығын бүкпесіз суреттеп, автордың ойын көрерменге анық жеткізді.
Береке-бірліктен жұрдай әулеттің үлкен ұлы тендерге түсіп, қомақты қаржы ұтқанымен мақтанады, болашаққа жоспар құрады. Менмендігі басымдау. Оның екі жүзді келіншегі дүкеннің иесі. Ой-өрісі таяздау әйел. Ортаншы ұлдары не бітіріп жүргені белгісіз. Ал кенже ұл мен келін жат діни ағымға саналары уланған, тіпті әке-шешесінен безініп кетуге әзір. Туғандарын кәпір деп, араласудан қалған. Әке-шешесі болса, бала-шағасының қас-қабағын бағып, тілеуін тілеп отырудан басқа амалдары қалмаған.
Шиеленістің бәрі шолжаңдаған кенже қыздарынан басталады. Қыдырып Бурабайға барып келемін деп, ірі көлемде есірткі әкетіп бара жатқандардың көлігіне соқтығысқан. Содан әулеттің төбесіне қара бұлт үйіріліп, ақыр соңы бес бөлмелі баспаналарынан айырылған. Үлкен ұлдары шетелге қашып тынған. Жат діни ағымның жетегінде жүрген кенже ұл мен келіндері Сириядағы ұшқан оқ пен жарылыстардың ортасынан бір-ақ шыққан. Шаңырақтың ортаға түскені осы шығар. Иә, қойылым қоғамның айнасы іспетті. Ең бастысы, заман дерті дендеп, қазақтың қаймағы бұзылмаса екен деп тіледік. «Көлеңке» қойылымының мақсаты да сол еді, елдің ойын түзеу...
Өскемен
