Осы жолғы дәстүрлі жәрмеңке Тәуелсіздік алаңында өткізілді. Мұнда Зеренді, Сандықтау және Ақкөл аудандарының өкілдері ауыл шаруашылығы өнімдерінің түрлерін кеңінен ұсынды.
– Біздің тауар өндірушілеріміз 38 сауда нүктесінде жұмыс істеп жатыр, – дейді Зеренді ауданының әкімі Ербол Сағдиев. – Жергілікті шаруа қожалықтары мен жауапкершілігі шектеулі серіктестіктер өнімнің жүзге жуық түрін сауда сөресіне қойып отыр. Әсіресе, Викторов ауылының балына, Исаковканың жеміс қайнатпаларына, өсімдік майына сұраныс көп. Ет, сүт және нан өнімдерімізбен қатар алты автокөлікке тиелген жемшөп пен құрама азықтың заматта өтіп кетуі қалалықтардың да өз ауласында мал өсіруге ден қойғанын аңғартады. Мұны қолдау қажет.
Облыстық ауыл шаруашылығы басқармасы бастығының орынбасары Бекболат Елбергеновтің айтуынша, ресми бекітілген аудандардан басқа аймақтардың өнімдері де көптеп сатылуда. Бұл еліміздегі молшылық пен байлықты көрсетеді. Бурабай ауданындағы “Есіл-Агро” ЖШС, “Бурабай құс” және Еңбекшілдер ауданындағы “Қаз Гер Құс” фабрикалары, Көкшетау қаласының жетекші кәсіпорындары дастархан мәзірімізді көркейтуге әрекет жасағаны көрініп тұр. Мұндағы баға да базарлар мен дүкендерге қарағанда анағұрлым арзан.
Жұртшылық көңілінен шыққан жәрмеңкеге қатысушыларды облыс әкімі Сергей Дьяченко құттықтады.
Бақберген АМАЛБЕК.
Көкшетау қаласы.
Соңғы жаңалықтар
