Демалыс орнына кіреберіс қақпаның маңдайшасындағы ту түстес көк тақтайшада ірі әріптермен әдіптелген «Ұлт рухы» деген жазу анадайдан көрінеді. Аллеяның қақ ортасында домбыраның мүсіні орналасқан. Оның айналасына қойылған он орындықтың төртеуіне күннің көзінен қуат алатын панельдер орнатылған. Мұндай смарт-құрылғылар тұрғындардың ұялы телефондарын қуаттап алуына және WIFI желісіне қосылуына мүмкіндік береді. Жаңа аллея түні бойы жап-жарық болып тұрады, мұнда орнатылған 10 шақты бағана шамы қас қарая бере автоматты түрде қосылады.
Тәуелсіздік аллеясының ашылу салтанатына жергілікті ардагерлер кеңесінің өкілдері, аудан әкімінің орынбасары Назгүл Манасова, «Варваринск» АҚ-тың атқарушы директоры Владимир Ефременко, мемлекеттік қызметшілер мен Тәуелсіздік жылы дүниеге келген жастар қатысты. Шара барысында әкім орынбасары Тобыл тұрғындарын жаңа демалыс орнының ашылуымен құттықтап, тоғыз жолдың торабында жатқан кентті абаттандыруға үлес қосқан кәсіпкерлерге алғыс айтты.
– Қасиетті Тәуелсіздігіміздің 30 жылдығына орай бүгін тұрғындар игілігіне беріліп жатқан «Ұлт рухы» демалыс алаңы ауданымыздағы ірі кәсіпорындардың көмегімен абаттандырылды. «Елу жылда ел жаңа» демекші, еліміз тәуелсіздікке ие болған 30 жыл ішінде біздің ауданымызда да көптеген игі іс атқарылды. Ауданымызға қазақ жазба әдебиетінің бастауында тұрған ұлы жазушы, жерлесіміз әрі мақтанышымыз Бейімбет Майлин атамыздың есімі берілгеніне де көп бола қойған жоқ. Ауданымыз көз алдымызда көктеп келеді. Жыл сайын жолдар жөнделіп, тротуарлар төселуде, көптеген әлеуметтік жоба жүзеге асырылып жатыр. Осының бәрі бірлігіміз бен елдігіміздің, тәуелсіздігіміздің жемісі, – деді Н.Манасова.
Қостанай облысы
