Басты құндылық – тұрақтылық

Дүбірге толы дүние

МАҚСАТҚА БЕЙБІТ ЖОЛМЕН ЖЕТУ КЕРЕК

Тәуелсіздігімізді жа­риялаған күннен бас­тап біздің елдерімізде жүзеге асқан көптеген үде­рістер өзінің мін­дет­терімен де, кө­кейкесті мәсе­лелерімен де, оларды шешу жолдарымен де ұқсас. Біздің экономикаларымызда да сәй­кестіктер көп. Украина мен Қазақстан ара­сын­дағы екіжақты қарым-қатынас тәуелсіздік алған кезеңнен бері дәстүрлі достық негізінде қалып­тасып, өзара сыйластық және өза­ра тілектестік ауанында сипатталады әрі халықаралық деңгейде ашықтығымен, сондай-ақ, өзара қолдау көрсетуімен ерекшеленеді. Мұндай жағдайды бір-бірін байланыстырып келген өткен тарихи күндермен, әлеуметтік-экономикалық қайта жаңару үдерістерінің ұқсастығымен, екі ел кәсіпорындары арасындағы кооперациялық байланыстардың тұрақтылығымен және тығыз адами байланыстармен де түсіндіруге болады. Өз тәуелсіздігін жариялаған жылдардан бері Қазақстан азаматтық қоғамның сапалы жаңа моделін құруға болатынын дәлелдеді, онда мультимәдени қалып демократиялық мазмұнмен үндесіп, үйлесім тапты. Соның бір белгісі Нұрсұлтан Әбіш­ұлы Назарбаевтың басты бастамаларының бірі – Қазақстан халқы Ассамблеясы. Қазақстан халқы Ассамблеясы еліміз өз тәуелсіздігін алған жылдардан бері, яғни мемлекетіміздің қалыптасуындағы алғашқы қиын-қыстау кезеңдердің өзінде рес­публиканы мекендеген барлық этностардың мүдделерінің бір жерде тоғысуына қажетті жағдай жасаған тиімді және сенімді құралға айналды. Демек, әлемдік тарихтағы мұндай қазақстандық феноменді және Мемлекет басшысының көрегендігін барлық адамгершілік тұрғысынан бағалау – келер күннің ен­ші­сіндегі міндет. Бірақ, қа­зір­дің өзінде бір нәрсе кү­мәнсіз. Қазақстан хал­қы Ассамблеясы – әм­бе­бап, ТМД-ның, қала бер­­ді әлемнің ешбір елін­де өзіне лайық баламасы жоқ, этнос­аралық жә­не кон­фессияаралық қа­рым-қатынастарды үй­лесті­ретін түбегейлі жаңа институт. Тәуелсіздікті алған жылдардан бері біздің қоғамда бейбітшілік пен келісім орнап келеді. Бізге мұны ешкім сыйлаған жоқ. Бұлар – Елбасы Н.Ә.Назарбаевтың салиқалы да сарабдал, жүйелі саясатының, біздің халқымыздың толеранттылығының, сондай-ақ, анағұрлым өткір мәселелерге қатысты өзара келісуге болатын мәміле жолдарын ұдайы және үздіксіз іздеу мен оларды табудың жемісі. Сол себепті де, Қазақстан мемлекетіміздің шекарасынан тыс жерлерде қандай да бір саяси үдерістер орын алса да, қандай да бір «дауылдар» өршеленіп соқса да, өзінің тұрақты болмысынан еш айныған емес. Біз өз елімізді, оның Конституциясын және заңдарын құрметтейміз, халқымыздың еңбегін бағалаймыз, достық пен адами қарым-қатынастарды қорғап, сақтаймыз. Халық бейбіт қарсылық пен жаппай тәртіпсіздіктердің шегі мен ара-жігін ажырата алуы тиіс. Ал билік қоғамдық тәртіпті қамтамасыз етудің шекті шаралары мен ашық «тәртіпсіздіктердің» шегін білуі қажет. Әрбір азаматтың туғандары мен жақындары бар екенін, оларды жақсы көретінін, күтетінін есте ұстау керек. Себебі, біздің барлығымыз, әлеуметтік мәртебеміз бен лауазымымызға қарамастан, адамбыз. Сондықтан, кез келген мақсатқа заңды, бейбіт жолдармен жеткен ұтымды. Юрий ТИМОЩЕНКО, Парламент Мәжілісінің депутаты. ____________________

МЕНІҢ ОТАНЫМ – ҚАЗАҚ ЕЛІ

Менің ар­ғы ата-бабал­а­рым­­ның отаны Украина же­рінде болып жат­қан жантүр­шігерлік уақи­ғалар мен қолдан жа­сал­ған дүрбе­леңдер маған осы ашық күнде найзағай жарқылдап, күн күркірегендей жанымды жабырқатады. Еңбек- сүйгіш украин халқының шебер қолымен, маңдай терімен жасалған материалдық және рухани, мәдени игіліктердің тас-талқан болып, күлі көкке ұшып жатқаны қандай ауыр десеңізші. Мен өзім қазақ жерінде туып-өскендіктен, қазақ халқының өткен тарихын тереңірек білуге серт еткен едім. Сондай бір қиын-қыс­тау кезеңде халық арасында «Қарын­дастан айырылған жаман екен, қара көзге мөлтілдеп жас келеді» деген зарлы да запыранды өлең жолдары өмірге келген ғой. Сол айтқандай, бүгінгі күндері ежелгі Украина топырағында жер сілкінісі, сел, өрт секілді табиғи апаттардың салдарынан емес, өзара түсініспеушіліктің әсе­рінен қан төгілуге жол беріліп жатқаны көзге жас келтірмей, жаныңды күйзелтпей қоймайды. Тіпті, қандай таби­ғи апат бол­масын эконо­микалық және мате­риал­дық мүдделер тұрғы­сынан қарас­тырғанда ерте ме, кеш пе оның орнын толтыруға болады. Ал нақақтан қиылған қыршын ғұмыр мен төгілген қанның орнын немен толтыра аламыз? Әрине, ештеңемен толтыра алмаймыз ғой. Дәл осы жәйт менің жас жү­ре­гімді сыздатқандай болады. Менің Отаным – Қазақ елінде қыз балаға қатысты тілекші деген сөз тіркесі айтылып қалып жатады. Дана халықтың о бастағы түсінігінен туған бұл ұғымды жоғары бағалаймын. Өйткені, өмірдің қызғалдағы іс­пет­тес қыз ата-анасымен бірге туып-өскен бауырларының аман болуына тілекші екені рас. Ирина ЖИЛИК, Қазақстан халқы Ассамблеясы жастар қанатының мүшесі. ОРАЛ.