Солтүстік Қазақстан облысы полиция департаменті баспасөз қызметінің мәліметінше, 23 қараша күні сағат 07.48 минут кеткенде «102» жедел арнасына Петропавл сыртындағы айналма жолда жол-көлік апаты болғандығы туралы хабар түскен.
Куәгерлер «LADA Largus» және «Урал 5557» көліктерінің соқтығысқаны туралы хабарлаған. Жол-көлік оқиғасы салдарынан «LADA Largus» жүргізушісі ауыр жарақат алып, оқиға орнында көз жұмды.
Осы факті ҚР Қылмыстық кодексінің 345-бабының 3-бөлігі бойынша Сотқа дейінгі тергеп-тексерулердің бірыңғай тізіліміне енгізілді. Қазір жол-көлік оқиғасының мән-жайы мен себептері анықталмақ. Бірқатар сараптама тағайындалды. Жүргізілген іс-шаралардың нәтижесі бойынша соңғы процессуалдық шешім қабылданады.
Полицейлердің айтуынша, дүйсенбіден бері СҚО жолдарында үш жол-көлік оқиғасы тіркелді. Салдарынан екі адам зардап шегіп, бір адам қаза тапты. Қолайсыз ауа райына және көктайғаққа байланысты полицейлер жол қозғалысының барлық қатысушыларынан жолдарда сақ болуды, жол жүрісі ережелерін қатаң сақтауды сұрайды.
Жүргізушілер жол-көлік оқиғасын болдырмас үшін қауіпсіз қашықтықты, бүйірлік аралықты сақтауы, сондай-ақ маневр жасауда абай болуы, жылдамдықты барынша азайтуы қажет. Жаяу жүргіншілер жолдардан тек рұқсат етілген орындардан өтуі тиіс.
