ҰЛЫ ЖЕҢІСКЕ МЫҢ ТАҒЗЫМ!

МӘҢГІЛІК АЛАУ. ӨШПЕС ДАҢҚ! Кеше Мемлекет басшысы Нұрсұлтан Назарбаев 7 мамыр – Отан қорғаушылар күніне және Ұлы Жеңістің 65 жылдығы құрметіне орай “Отан қорғаушылар” монументіне гүл шоғын қойды. Гүл шоғын қою рәсімінен кейін жиналған қауым бейбітшілік пен өз елінің ертеңі үшін кеудесін от пен оққа тосып, сұрапыл соғыста қаза тапқан қазақстандық жауынгер­лер­ді бір минөт үнсіздікпен еске алды. Одан соң еліміздің мемлекеттік Ән­ұраны ойналды. Салтанатты шара Республикалық ұлан сарбаздары­ның ел Президенті – Қазақстан Қа­рулы Күштерінің Жоғарғы Бас қолбасшысы Нұрсұлтан Назарбаев­тың алдында салтанатты шеру жасап өтуімен әрі қарай жалғасты. “Отан қорғаушылар” монументі орын тепкен алаңға соғыс арда­герлері мен әскери қызметшілер де, қала тұрғындары мен қонақтар да көп жиналған екен. Салтанатты рәсімнен соң, Елбасы ардагер аға-аталарымызбен, сондай-ақ жинал­ған қауыммен емен-жарқын аман­дасып, олардың арасында шамалы кідіріс жасады. Салтанатты шара аяқталғаннан кейін “Халық Қаһарманы”, гене­рал-лейтенант Бақытжан Ертаевпен аз-кем сұхбаттасқан едік. “Бүгін Қа­зақстан Қарулы Күштерінің құ­рылғанына 18 жыл толып отыр, – деді Бақытжан Ертаев. – Енді екі күннен соң Ұлы Жеңіске 65 жыл толады. Біздерге бейбітшілік сый­ла­ған соғыс ардагерлеріне, қан май­данда мерт болған жауынгерлер әруағына басымды иемін. Қазақтың ержүрек ұлт екенін соғыс кезінде ата-апаларымыз өздерінің жан­қияр­лық ерліктерімен дәлелдеді. Өз елі мен жерін қорғап, Отанына адал қызмет ету – әр жауынгердің азаматтық борышы, міндеті. Біздің Қарулы Күштеріміз бүгінде сол үдеден шығып келеді”. Салтанатты рәсімге Парламент Сенатының Төрағасы Қ.Тоқаев, Парламент Мәжілісінің Төрағасы О.Мұхамеджанов, Премьер-Ми­нистр К.Мәсімов, Президент Әкім­шілігінің Басшысы А.Мусин, “Нұр Отан” ХДП Төрағасының бірінші орынбасары Н.Нығ­матулин, сон­дай-ақ Үкімет мү­шелері мен өзге де ресми адамдар қатысты. Әлисұлтан ҚҰЛАНБАЙ.