Салтанатты шара Қазақстанның тәуелсіздік алған 30 жылдағы қол жеткен табыстары мен алған асуларына арналған көркем көріністермен ашылды. Соның ішінде Семей ядролық полигонының жабылғаны, Тоқтар Әубәкіровтің ғарышқа ұшуы, Мемлекеттік рәміздердің қабылдануы, ұлттық валютаның өмірге келуі, жаңа Конституцияның қабылдануы, ҚХА-ның құрылуы, «Қысқы Универсиада» мен ЭКСПО-2017-нің өткізілуі – бәрі қамтылды. Облыс халқын ұлық мерекемен құттықтаған Спикер Тұңғыш Президент – Елбасы Нұрсұлтан Әбішұлы Назарбаевтың «алдымен – экономика, одан кейін – саясат» деген салиқалы саясатының арқасында еліміздің барлық қиындықтан аман-есен шығып, бір биіктен бір биікке жеткенін атап өтті. Осы жолда Мемлекет басшысы Қасым-Жомарт Кемелұлы Тоқаев еліміздің даму стратегиясын одан әрі жалғастырып, саяси, әлеуметтік-экономикалық реформаларды жүзеге асырып жатқанын айтты. Сонымен қатар Нұрлан Нығматулин Солтүстік Қазақстан облысы мен тұрғындарының тәуелсіз Қазақстанның жетістіктеріне қосқан елеулі үлесін атап өтті. Мәжіліс Төрағасы атап өткендей, қазіргі уақытта Солтүстік Қазақстан облысы өндірістік салада жоғары нәтиже көрсетіп, онда жыл сайын жаңа кәсіпорындарды іске қосып, көптеген жаңа жұмыс орындарын ашуда. Өнімнің көптеген түрі тек Қазақстанда ғана емес, әлемдік нарықта да белгілі.
Осыдан әрі Парламент Мәжілісінің Спикері Президент Қ.Тоқаевтың тапсырмасымен мемлекеттік наградалар тапсырды. Марапатқа ие болғандардың арасында ғалымдар, ауыл шаруашылығы тауарларын өндірушілер, мұғалімдер мен дәрігерлер, жұмысшылар мен құтқарушылар, кәсіпкерлер, әртістер мен спортшылар бар. «Парасат» орденімен археолог Виктор Зайберт марапатталды. Ол Солтүстік Қазақстанның ежелгі тарихы бойынша бірнеше ғылыми жаңалықтың, көптеген кітап пен мақала авторы. Қазақстандық ғалым тарапынан жылқыны қолға үйретудің ең көне ескерткіші саналатын энеолит дәуірінің «Ботай қонысы» бірегей ескерткішінің ашылуы әлемдік танымалдылыққа ие болды. «Құрмет» орденімен Петропавл балалар әлеуметтік қызмет көрсету орталығының тәрбиешісі Елена Кислякова, кәсіпкер Екпін Әбиев және туған ауылдарын дамытуға қаржылық қолдау көрсетіп отырған фермерлік шаруашылықтардың басшылары Қалым Даньяров, Абдурахим Нукаев марапатталды. III дәрежелі «Еңбек Даңқы» орденін еңбек ардагерлері, механикалық жинау цехының токары Сергей Каретов және құрылыс саласында 40 жылдан астам жұмыс істейтін краншы Фархан Сафаргалеев иеленді. «Ерлігі үшін» медалі 16 адамның өмірін құтқарған өрт сөндіруші Айтбай Сәдуақасовқа, «Ерен еңбегі үшін» медалі – кардиолог дәрігер Асқар Молжігітовке, жеңіл атлет Ирина Эктоваға, «Шапағат» медалі – балалар үйінің тәрбиешісі Айым Әбдірахмановаға, Уәлиханов аудандық ауруханасының бас медбикесі Марина Охматқа тапсырылды.
Марапаттан соң Нұрлан Нығматулин өңір тұрғындарын айтулы күнмен және жоғары наградалармен құттықтай отырып, солтүстікқазақстандықтар еліміз дамуының маңызды кезеңінде жаңа табыстарға жететініне сенім білдірді.
Осыдан кейін сөз облыс әкімі Құмар Ақсақаловқа берілді. Өңір халқын 30 жылдық мерейтоймен құттықтай отырып, әкім «тәуелсіздіктің маңызына және облыстың осы жылдарда қол жеткізген табыстарына тоқталды.
– Тәуелсіздік – біздің ұлы құндылығымыз, ең биік жетістігіміз. Еліміз 30 жылда кемелденіп, дамудың жаңа белесіне шықты. Ұлы жерлесіміз, ақын Мағжан Жұмабаев айтқандай, «біз ғасырлар тоғысында ата-бабаларымыз аңсап, армандап кеткен азаттықтың алтын айына қол создық. Ежелден еркіндікті аңсаған қазақ ұлы мұратына қол жеткізді. Тәуелсіз мемлекетіміздің іргесін бекемдеп, еліміздің тыныштығы мен қауіпсіздігін нығайтуға, Қазақстанның айдай әлемге танылуына ерекше еңбек сіңірген Тұңғыш Президентіміз Нұрсұлтан Әбішұлы Назарбаевтың күні кеше ғана жарық көрген «Тәуелсіздік тағылымы» мақаласында Тәуелсіздік те бақыт сияқты, бағалаған адамның, аялаған қоғамның қолына тұрақтайды. Міне, бүгін біз қуатты, егемен, еркін елде өмір сүріп жатырмыз, – деді.
Бүгінгі таңда аймақтық жалпы өнім 30 жылда 15 есе өсті. Жан басына шаққанда ІЖӨ көлемі 23 есе артты. Еңбек өнімділігі соңғы 10 жылда 7 есе өсті. Ауыл шаруашылығының биылғы жалпы өнімі 890 млрд теңгеге жетіп, 2017 жылмен салыстырғанда 2 есе өскен. Ал өнеркәсіп өнімі биыл 360 млрд теңгеге жетіп, алдындағы жылмен салыстырғанда 8 пайызға артты. Тәуелсіздік жылдарында облыс экономикасына 2,2 трлн теңге инвестиция салынды. Әкімнің баяндамасында осы және басқа да жетістіктер айтылды.
Одан әрі салтанатты іс-шара мерекелік концертке жалғасты. Оған жергілікті өнерпаздармен қатар, Абай атындағы опера және балет театрының әртістері Азамат Асқаров, Жанель Тукеева, Жәмила Серкебаева және басқалар қатысты.
Петропавл
