Жиында сөз сөйлеген Қарағанды қаласының әкімі Ермағанбет Бөлекбаев тұрғындарды айтулы қуанышпен құттықтады. Сондай-ақ ол ауданды қайта атау – бұл ең алдымен Әлихан Бөкейханның тарихи қызметіне, жалпы еліміздің тарихына берілген құрмет екенін атап өтті. 
– Ауданның атауы ғана емес, келбеті де өзгереді. Соңғы бірнеше жылда үйлердің қасбеттерін, шатырларын, кіреберіс жолдары мен орамішілік жолдарды жөндеу бойынша үлкен жұмыстар жүргізілді. Майқұдық орталық жолын ауқымды қайта құру аяқталды. Бірнеше заманауи тұрғын үй кешендерінің құрылысы жүріп жатыр, шағын аудандарда жаңа емханалар іске қосылды. Қайта құру жұмыстарынан кейін «Литейщик» стадионы ашылды. Алда әлі талай өзгерістер болады, – деді қала басшысы.
Іс-шараға қатысқан Қарағанды қалалық мәслихатының хатшысы Құдайберген Бексұлтанов Тәуелсіздік күні қарсаңында Октябрь ауданының Қазақстанның бірлігін, оның жарқын болашағын армандаған Әлихан Бөкейхан атындағы аудан болып өзгертілгені тарихи мәні зор оқиға деп атап өтті.
Еске салар болсақ, Әлихан Бөкейхан атындағы аудан 1938 жылы Қарағандының солтүстік бөлігінде құрылған. Ол 1961 жылға дейін Сталин ауданы болып аталып келді. Содан кейін Октябрь ауданы болып өзгертілді. Жер көлемі 22,4 мың гектар болатын ауданда 227 мың адам тұрады.
