«Биыл 2022 жылдан 2025 жылға дейін аяқтау мерзімімен 129 мың тонна балық өсіру көлемімен 32 жобаны іске асыру басталды. Шамамен 182,0 млрд теңге инвестиция тарту көзделіп отыр», деді Ахметжан Пірімқұлов Үкімет отырысында.
Атап айтқанда, Ақмола облысында бекіре өсіру бойынша «Аквафактория» ЖШС жобасы бойынша мемлекеттік сараптаманың оң қорытындысы алынды. Қарызды сақтандыру шартын жасасу мәселесі шешілуде. Бұл құрылысты бастау үшін 2,7 млрд теңге көлемінде қарыз қаражатын пайдалануға мүмкіндік береді.
«Қарағанды облысында «Сарыарқа» АЭА аумағында қуаттылығы тәулігіне 300 тоннаға дейін балық азығын өндіретін зауыт салу жобасы бойынша жұмыстар жүргізілуде. Сондай-ақ, жыл соңына дейін Әзербайжан, Германия және Израиль мамандарын тарта отырып, жобалау аяқталады. Инвестиция көлемі - 30 млрд. теңге. Бес жоба бойынша Алматы, Жамбыл, Қостанай және Маңғыстау облыстарында құрылыс-монтаждау жұмыстары жүргізілуде. Екі жоба бойынша Алматы облысында су қоймалары бекітілген. Біз мемлекеттік органдармен және облыс әкімдіктерімен бірлесіп, бағдарламаның барлық көрсеткіштерін жүзеге асыру және қол жеткізу, сондай-ақ инвестициялық жобаларды іске асыру бойынша жұмыстарды жалғастыратын боламыз», деді вице-министр.
