* Астанада биыл геологиялық зерттеу орталығы салынады. Оның құрылысы жылдың соңына қарай басталады. Индустрия және жаңа технологиялар вице-министрі Нұрлан Сауранбаевтың айтуынша, орталық өз алдына геологиялық кластер ретінде қалыптасады.
* «ҚазАгро» Ұлттық басқарушы холдингі» 100 млн. АҚШ доллары көлемінде жеңілдетілген несие тартты. Ол еліміздегі агроөнеркәсіп кешенін қаржыландыруды жүзеге асыруға, холдингтің айналым капиталын толықтыруға бағытталады. Жасалған мәміле мемлекеттік бағдарламаларды қолдау мақсатында «ҚазАгро» мен халықаралық банктер арасында қызметтестіктің көрнекі мысалы болып табылады.
*Павлодарда «Бизнестің жол картасы-2020» бағдарламасы аясында 12 жоба мақұлданды. Мұны баяндаған «Даму» қоры аймақтық филиалының бас менеджері Айгүл Әлібекова жобалардың жалпы сомасы 1 млрд. теңгені құрайтынын айтты. Олардың арасында жүк тасымалдарын ұйымдастыру, жиһаз өндірісі, спорт саласында қызмет көрсету бар.
*Алматыда мереке қарсаңында 80 әйел баспаналы болды. Олардың кілттерін халықаралық әйелдер күніне арналған шарада тапсырған қала әкімі Ахметжан Есімов «Қолжетімді баспана-2020» бағдарламасы аясында атқарылып жатқан жұмыстарға тоқталып өтті.
*2013 жылы республикалық бюджет кiрiсiндегi шикiзаттық емес сектордың үлесi 76 пайызға жуықтады. Өткен жылғы кiрiстiң 75,8 пайызы шикiзаттық емес секторға тиесілі болды. Бұл 2012 жылмен салыстырғанда, 2,3 пайызға жоғары.
*Қызылорданың көпқабатты үйлеріне тұңғыш рет ыстық су берілді. Облыс әкімі Қырымбек Көшербаевтың екі жыл ішінде бұл проблеманы шешу жөніндегі уәдесінің басы осылай жүзеге аса бастады. Облыс орталықтары арасында ыстық суы жоқ жалғыз шаһар саналып келген елді мекенде әзірге бұл игілікті қанатқақты жоба негізінде 40 пәтерлі екі үй көре бастады. Қазір облыс орталығын толық ыстық сумен қамту үшін 45 млн. теңгеге техникалық-экономикалық негіздеме дайындалуда.
*Қостанайда көлік жүргізетін бойжеткендердің байқауы өткізілді. Осымен қатарынан алтыншы жыл полицейлер ұйымдастырып келе жатқан конкурстың қорытындысында 10 бәсекелестің арасында Ольга Ким есімді ару жеңімпаз атанды.
*Батыс Қазақстанда бес ауыл әкімінің үстінен қылмыстық іс қозғалды. Облыстың Жәнібек ауданында орын алған бұл оқиға бюджет қаржысын ысырап етудің негізінде орын алып отыр.
BNews.kz, Nur,kz, Egemen.kz
хабарлары бойынша дайындалды.
