Іс-шара барысында италиялық заманауи суретші Луиза Валентинидің «Раушан» инсталяциясы таныстырылды. Салтанатты рәсімде сөз сөйлеген Италияның Қазақстандағы Төтенше және өкілетті елшісі Марко Альберти бұл туындының таңдалу себебін түсіндірді. «Қазақстанды Тәуелсіздіктің 30 жылдық мерейтойымен шын жүректен құттықтаймын. «Раушан» инсталяциясын таңдауымыздың бірнеше себебі бар. Біріншіден, раушан гүлі махаббаттан бөлек сенімді, құрметті білдіреді. Осы туынды арқылы екі ел арасындағы байланыстың маңызын көрсеткіміз келді. Сондай-ақ гүлдің жайқалып өсуі үшін оған ерекше күтім керек. Ендеше, осы арқылы Италия мен Қазақстан арасындағы қарым-қатынасымызды ілгерілету үшін өзара байланысқа ерекше көңіл бөлген жөн. Инсталяция арқылы осыны көрсеткіміз келді», дейді Марко Альберти.
Луиза Валентини – италиялық жас суретшінің бірі. Іс-шараны ұйымдастырушылардың айтуынша, аталған суретшіні таңдаудың да сыры бар. Өйткені 30 жылдық мерейтой тарихта аз ғана уақыт. Жас өнерпаздың туындысы арқылы Қазақстанның келешегі жарқын екенін көрсетуді мақсат тұтқан.
Қазақстан 1991 жылы егемендік алғаннан кейін тәуелсіздігімізді мойындаған алғашқы елдердің бірі – Италия. Осы маңызды тарихи оқиғадан кейін екі ел арасында дипломатиялық қарым-қатынас орнап, елшіліктер ашылғандығы белгілі. Бүгінде бұл елшіліктер саяси-экономикалық, мәдени және тағы басқа қарым-қатынастарды дамыту жолында табысты қызмет атқарып келеді.
Салтанатты рәсімге елшілер, белгілі мемлекет және қоғам қайраткерлері, сондай-ақ шығармашылық зиялы қауым өкілдері, музей қызметкерлері қатысты.
