Өзара мүдделестік орайындағы әңгіме

Мемлекет басшысы Нұрсұлтан Назарбаев ҚХР Сыртқы істер министрінің орынбасары Чен Гопинді қабылдады, деп хабарлады Президенттің баспасөз қызметі. Кездесу барысында екіжақты ынтымақтастық мәселелері, сон­дай-ақ, халықаралық күн тәртібінің өзекті жайттары талқыланды. Нұрсұлтан Назарбаев Қазақ­стан мен Қытай арасындағы қа­рым-қатынастардың тиімді дамып келе жатқанын, біздің еліміз экономикалық және саяси серіктестіктің одан әрі нығаюына мүдделі екенін атап өтті. Мемлекет басшысы ҚХР-дың Азиядағы өзара іс-қимыл және сенім шаралары жөніндегі кеңес қызметіне белсене қатысып келе жатқанына тоқталды, сондай-ақ, 2014 жылы мамырда Шанхайда өтетін АӨСШК-нің алдағы саммитіне дайындықтың деңгейі жоғары екенін айтты. Чен Гопин өз кезегінде Нұр­сұлтан Назарбаевқа ҚХР Төрағасы Си Цзиньпиннің сәлемін жеткізді және Қазақстан Президентінің Қытайға алдағы мемлекеттік сапарына дайындық барысы туралы хабарлады. Суреттерді түсіргендер С.БОНДАРЕНКО, Б.ОТАРБАЕВ.