Футбол: Қазақстан жастар құрамасы жеңіске жетті

Қазақстан құрамасы 2015 жылы жастар арасында өтетін Еуропа чемпионатының іріктеу турнирінде Исландияны қабылдап, 3:2 есебімен жеңіске жетті. Бұл туралы Қазақстан футбол федерациясы хабарлады. Бұл кездесу тартысты және қызықты өтті. Ойынның алғашқы минуттарында алаң иелері бір гол соғуға мүмкіндік алды. 7 минут аралықта Тоқтар Жаңғылышбай қонақтар қақпашысының қателігін пайдаланып, Станислав Лунинге пас берді. Осы кезде ешкімнің қарауынсыз қалған қазақстандық ойыншы бос қақпаға гол соқты.  Содан кейін бес минут өткенде Роман Мұртазаев допты тағы да торға дәл бағыттады. Бірінші тайм осылай 2:0 есебімен аяқталды. Ал матчтың екінші жартысында алаң иелері «белдіктерін» босатып ойнағанда қонақтар екі бірдей доп соғуға мүмкіндік алды. Осы кезде біздің құрама қайта шабуылға көшті. Соның нәтижесінде матчтың 90-минутында Исламбек Қуаттың алыстан тепкен добы Қазақстан құрамасына жеңіс сыйлады. Кездесуде Исландия командасында Хольмберт Фридьонссон мен Йортюр Херманнссон бір-бір доптың авторы атанды. Дастан Кенжалин. Дереккөз: http://kazsporttv.kz