«Өткен жылы мектебімізге жерлесіміз Ақселеу Сейдімбектің есімі берілді. Карантин мен қашықтықтан оқытудың салдарынан біз оның мұражайын бірден аша алмадық. Есесіне мұны Тәуелсіздіктің мерейтойында жүзеге асыра алдық. Мұражайда Ақселеу Сейдімбектің өмірі туралы стендтер, ол туралы мақалалар, еңбектері, оқушылардың ғылыми жұмыстары мен фотосуреттері ұсынылған», деді мектептің тарих пәнінің мұғалімі Жадыра Рысбекова.
Мұражайда жазушының қалта пышағы және оның кейбір жеке заттары бар. Болашақта мектеп оқушылары Ақселеу Сейдімбектің өмірі мен еңбек жолын мұражайда жинақталған құжаттар мен ол туралы мақалаларға сүйене отырып зерттей алады.
Ақселеу Сейдімбек – Жаңаарқа ауданының тумасы. Көп жылдар бойы «Орталық Қазақстан» газетінде еңбек етті. 1976 жылдан республикалық «Социалистік Қазақстан» басылымында әдебиет және өнер бөлімінің меңгерушісі болып жұмыс істеді.
Сондай-ақ ол «Зерде» журналында, «Әлем» альманахында, Мұхтар Әуезов атындағы Әдебиет және өнер институтында басшылық қызметтер атқарды. Ыбырай Алтынсарин атындағы білім беру институтының директоры, Қазақ білім академиясының тұңғыш президенті, Президенттік мәдени орталық директорының орынбасары болды. Л. Н. Гумилев атындағы Еуразия ұлттық университетінде дәріс берді.
2003 жылы «Қазақстанның еңбек сіңірген қайраткері» атағы берілді. 2004 жылы Мемлекеттік сыйлықтың лауреаты атанды.
