Аймақтар • 27 Желтоқсан, 2021

Қажет шаруаларға қаражат бөлінбеген

242 рет
көрсетілді
5 мин
оқу үшін

Табиғаттың жерүсті және жерасты байлығын тиімді пайдалану бүгінде өзекті болып отыр. Оның ішінде су мәселесі тіршілік көзі, ауыл шаруашылығы саласын алға бастырушы негізгі тетік болғандықтан, маңызы артып тұр. Әсіресе соңғы жылдары елімізбен қатар, су тап­шылығы анық байқалатын Жамбыл облысында да бұл өзекті. Осы орайда Мемлекет басшысы Қасым-Жомарт Тоқаев суды тиімді пайдалануға байланысты тапсырма берген болатын.

Қажет шаруаларға  қаражат бөлінбеген

Коллажды жасаған Зәуреш СМАҒҰЛ, «ЕQ»

Президент тапсырмасына сәйкес қазіргі кезде Жам­был об­лысында су балансы жа­са­лып, «Жол картасы» әзір­ленген. «Жұмыспен қамту­дың жол картасы» бағдар­ла­ма­­сы аясында 2020-2021 жыл­­дары өңірдегі ком­му­нал­дық меншіктегі 81 су шаруа­шы­­лығы нысан­ы­н қал­пы­­­на келтіру жұмыс­тары жүр­­­гізілген. Атал­ған нысан­дар­­­дың ұзындығы 374,8 ша­қы­­рым­­ды құрайды. Нәти­жесінде, 22,9 мың гектар суармалы ал­қап қай­та айна­лымға қосылып отыр.

Бүгінгі таңда Жамбыл об­лы­­сын­дағы бірқатар су қой­ма­­ларының құрылысы Еуро­палық қайта құру және даму банкі арқылы жүр­гі­зілуде. Со­ны­мен қатар «Тасөткел» су қой­­ма­сы­ның қазір­гі жағдайы мен ұң­­ғы­ма­лар­ды қалпына кел­тіру мәсе­лесі де өзекті. Бұл ретте өңір­дегі жерүсті және же­р­асты су қорларын зер­­­де­леу ма­ңызды бо­лып тұр. Деген­­мен аймақ­та су мәсе­ле­сіне қа­тысты жұ­мыс­тар­дың қарқыны төмен.

Облыс әкімі Бердібек Сапар­баев бұл саладағы сылбыр жұ­мыстарды сынға алған болатын. Мәселен, үш ай бұрын тиісті басшыларға берілген тапсырмалар әлі күнге орындалмаған. Тіпті «Жол картасы» бойынша жүзеге асуы тиіс 34 жобаның ішіндегі 11 жобаның ғана жұ­мысы жүруде. Осы орайда, «Қаз­сушар» рес­пуб­ли­калық мекемесі облыс­тық филиалының директоры Қазыбек Бедебаев өңірдегі бес ауданда 34 жоба бойынша қайта жаңғырту басталып кет­кенін, бүгінге дейін 46 канал, 46 ұңғыма жөнделгенін айтты. Алайда мұнда да бірқатар жобалар мерзімінен кешігуде.

Ал облыстық ауыл ша­руа­шылығы басқармасының басшысы Ербол Жиенқұловтың айтуынша, «Жол картасында» республикалық мен­шіктен коммуналдық мен­шікке ауыс­тыру арқылы жалпы ұзындығы 1 млн 375,6 мың ша­қырымды құрайтын 202 ка­налға жөндеу жұмыстарын жүр­гізіп, 41,9 мың гектар суармалы алқапты қайта айналымға енгізу жоспарланған екен. Сон­дай-ақ басқарма басшысы облыстық бюджет қа­ражаты есебінен ағымдағы жы­лы 26 ұңғыма зерделеніп, оның ішінде 11 ұңғыманың қайта қалпына кел­тіруге жарамды екендігі анық­талып, толық сметалық есебі әзірленгенін айтты.

«Сметалық есепке сәйкес, аудан әкімдіктері тарапынан ұң­ғымаларды қалпына келті­руге 47,2 млн теңге, ал инфра­құ­рылымға 410,4 млн теңге қаржы қарастырулары қажет болатын. Алайда бүгінге Байзақ, Жамбыл, Меркі және Т.Рысқұлов аудандары әкімдіктеріне құжаттары дайын ұңғымаларды қалпына келтіру бірнеше рет тапсырылса да, әлі күнге дейін қаржы қа­рас­тырылмады», дейді Ербол Жиенқұлов.

Сонымен қатар еліміздің Ауыл шаруашылығы минис­тр­лігі Су ресурстары комитетінің Су рес­урстарын пайдалануды реттеу және қорғау жөніндегі Шу – Талас бассейндік инспек­циясының басшысы Гүлмира Имашева мен «Жамбыл су қоймалары» меке­месінің директоры Айдар Асамбеков те бұл мәселе жөнінде тиісті бірқатар жұмыс атқарылып жатқанын жеткізді. Бірақ кейбір аудан әкімдіктерінің тарапынан тиісті қаражаттың бөлінбеуі, берілген тапсырмалардың дер кезінде орындалмауы және тағы да басқа мәселелер өңірдегі су ша­руашылығының дамуына кедергі келтіруде.

Жалпы, өңірдегі барлық то­ғандар мен су айдындарын және су жиналатын қоймаларды тиімді пайдалану қажеттігі жиі айтылады. Жамбыл облысы ауыл шаруашылығы дамыған әрі сол салаға қолайлы өңір болғандықтан, бұл керек те. Себебі, жыл өткен сайын аймақта су тапшылығы қатты сезілуде. Көрші Қырғыз елінің «Киров» су қоймасынан келетін су бар болғанымен, бәрібір өзімізде барды ұқсатудың маңызы артып тұр. Сол сияқты, өңірде баға тұрақтылығын ауыл шаруа­шылығы өнімдерін көп көлемде өндіру арқылы ғана сақтап қалу мәселесі де қарастырылуда. Енді әр басшы әр жаққа бұра тартпай, су мәселесіне келгенде селқостық танытпай, өңірдегі су тапшылығын шешуге күш салса болғаны. Әйтпесе, сылбыр жұмысқа сын да көп айтылады.

 Жамбыл облысы