Онда Ресей архивтері мен Қазақстан қалаларындағы ханға қатысты архив материалдары топтастырылған. Бұл – ғалымның көпжылдық еңбегінің нәтижесі. Болашақ абылайтанушылар архив шаңдарын жұтпай, бір кітапқа шоғырландырылған ханға қатысты мәліметтерді осы жинақтан таба алады.
Жуырда облыс орталығындағы ең үлкен мәдениет орны – Жасөспірімдер сарайында кітаптың тұсаукесер рәсімі болып өтті. Оны университет ректоры Ерлан Шоланов ашып жүргізіп отырды. Өзінің сөзінде ректор бұл еңбектің СҚУ қабырғасында жарық көруі өздері үшін үлкен абырой екенін айтты. «Қазақ халқының мыңжылдық тарихында ел басқарған көсемдер, сөз бастаған шешендер мен қол бастаған батырлар көп болған. Елбасы Н.Назарбаев Абылай хан есімін жоғары бағалайды. Баршамызды Абылай хан рухы қолдап жүрсін», деді ол.
Облыс әкімінің орынбасары Ғани Нығметов өңір басшысының құттықтау хатын оқыды және еңбектің маңыздылығына тоқталып өтті. «Мыңнан артық құжаттың басын құраған бұл еңбектің танымдық маңызы аса зор болмақ. Олар ұлы ханымызды бүгінгі және болашақ ұрпаққа жан-жақты танытады», деді ол өзінің сөзінде. Еңбектің маңыздылығы жөнінде СҚУ ректорының кеңесшісі, тарих ғылымдарының докторы Ақмарал Ыбыраева, облыстық архивтің директоры Сәуле Мәлікова, тарих ғылымдарының кандидаты Сәуле Қартова, «Рухани жаңғыру» зерттеу институтының басшысы Гүлнар Ахметжанова және т.б. айтып берді.
Кітаптың тұсауын облыс әкімінің орынбасары Ғани Нығметов, облысқа белгілі азаматтар Құдайберген Қалиев, Жомарт Омаров, Нағашыбай Барлыбаев, Кемел Оспанов және т.б. кесті.
