ЖУРНАЛИСТЕРДІҢ ЖЫЛДАҒЫ ЖАРЫСЫ

Жыл сайын Ал­маты­да 8-9 мамыр күндері БАҚ ара­сында шағын фут­бол­дан белгілі жазу­шы, спорт журналис­ти­касын­ың көш­бас­шы­сы Сейдахмет Бер­­діқұловты еске алуға арналған тур­нирдің өтетіні белгілі. Сейдағаңның туған күнін­де жылдағы дәстүр бойынша қолына қалам мен микрофон ұстаған әріптестеріміздің арасында өтетін турнир биыл 15-ші мәрте жалауын көтерді. Бұл турнир журналистердің жылына бір рет әсем Алматы­ның ашық аспаны астында доп теуіп, коман­даларының бағын сынап көру үшін асыға күтетін бәсекесіне айналғаны жасы­рын емес. Өйткені, күнделікті өмірде көп ретте қызмет бабы бойынша кездесетін әріптестеріміз үшін бұл турнирдің жасыл алаңда доп теуіп қана қоймай, бір-бірімен етене араласу үшін де маңызы зор. Сол көрініс биылғы бәсекеде де өз жалғасын тапты деуге болады. Осы жылғы турнирге “Қазақ газеттері” ЖШС құрамына кіретін бірнеше басылымнан тұратын құрама команда, “Егемен Қазақ­стан” газеті, “Қа­зақ­стан” ұлттық арнасы, “Хабар” телеарна­сы сияқты ұжымдар мен басқа да газет-журналдарды қосқанда барлығы 15 коман­да қатысып, 2 күн бойғы кездесулер барысында бір-бірімен етене араласып, қызықты да тартысты ойын өрнегін көрсетті. Турнирдің ашылу салтанатында Сей­дағаң­­ның ұлы Заңғар Бердіқұл, “Қазақ газеттері” ЖШС бас директоры Жұмабек Кенжалин, “Жас Алаш” газетінің бас ре­дак­торы Рысбек Сәрсенбай, “Алаш айна­сы” газетінің бас редакторы Серік Жан­болат пен басқа да БАҚ басшылары сөз сөйлеп, осы турнирдің мән-маңызы мен Сейдағаңның қазақ спорт журналис­ти­касының қалыптасуына қосқан қомақты үлесі жөнінде айтты. Осыдан кейін сөз алған Туризм және спорт министрлігі Спорт істері жөніндегі комитеті, Штаттағы ұлттық командалар және спорт резерві дирекциясының басшысы Қайрат Жан­пейісов пен оның орынбасары Алексей Крючков та турнирдің маңыздылығы жө­нін­де кеңірек мәлімет берді. Жеребе тарты­лып, ойын басталған соң, үш топқа бөлінген 15 команда арасындағы турнирдің бірінші күні әр топқа түскен 5 команда өзара кездесті. Мұнда жеңілгендері жарыстан шықса, ұпай саны бойынша алғашқы екі орынды иеленген командалар келесі айна­лымға жолдама алып жатты. Сөйтіп, турнирдің екінші күні “Егемен Қазақстан” газеті, “Қазақ газеттері” ЖШС, “Хабар” мен “Жас қазақ” командасы, “Алматы ТД”, “КТК-Караван”, “Қазақ­стан” ұлттық арнасының командасы екі топқа үш коман­дадан бөлініп, жарысты жалғастыру мүм­кіндігіне ие болды. Бұл сында өзара кез­десу­лер бойынша ең көп 11 ұпай жинаған “Қазақстан” телеарнасының командасы бірінші орынды, “Хабар-Жас қазақ” командасы екінші, ал үшінші жүлделі орынды “Қазақ газеттері” ЖШС ұжымы иеленді. Сонымен бірге, турнирдің соңында ұйымдастырушылар тарапынан мына ойын­­шылар жекелеген номинация бойын­ша үздіктер қатарынан көрінді. Мұнда үздік ойыншы атағына Шоқан Мақанов (“Қазақстан” телеарнасы) ие болса, үздік қақпашы болып Аршат Оразов (“Егемен Қазақстан” газеті) танылды. Ал турнирдің ең үздік шабуылшысы Жандос Айтбай (“Хабар” агенттігі), үздік төреші болып Бақытжан Нұрпейісов атанды. Сондай-ақ, Туризм және спорт министрлігі жыл сайын Сейдахмет Бердіқұловты еске алуға арнал­ған турнирді өткізуге мұрындық болып келе жатқан белгілі азаматтар Ғазизбек Тәшім­бай мен Альберт Озолды, ҰШКД дирек­­торы Қайрат Жанпейісовті бәсекені ұйым­­дастыруға зор үлес қосқаны үшін атау­­лы дипломдармен марапаттауды ұмытқан жоқ. Осы жерде белгілі спорт журналисі Рабат Жәнібековтің де турнирге қосып жүрген үлесін атап өтпеске болмайды. Ал жасыл алаңда өнер көрсеткен әріптестерімізге келер болсақ, биылғы турнирде өз жұмы­сында кәсіби біліктілігімен көрініп жүрген Шарафаддин Әмір, Мұхитдин Салқымбаев, Жарас Сәрсек, Срайыл Смайыл, Жанарбек Әшімжан, Саттар Ерназаров, Ғалым Сүлей­мен, Ержан Байтілес, Төлеубек Қадырмол­ла, Шалқар Естен, Ерік Рахым, Ақын Орда­байұлы, Амангелді Сейітхан, Асқар Тұрап­байұлы, Қайрат Мамырбаев, Есей Жеңіс­ұлы сияқты әріптестеріміздің жасыл алаңда да өз ойын өрнегімен көзге түскендерін атап өткеніміз жөн. Дастан КЕНЖАЛИН. АЛМАТЫ.