Қостанай трактор зауыты былтыр 400 трактор құрастырып, өндіріс көлемін 65%-ға дейін ұлғайтты. Алдыңғы жылы небәрі 242 трактор жасап шығарған зауыт, осылайша, жоспарын 20 пайызға асыра орындап, жылды жемісті аяқтады. Бұған дейін тракторды Ресейден бүтіндей бөлшек түрінде әкеліп, оны тек құрастырумен ғана шектеліп келген қостанайлық зауыт былтырдан бастап «Кировецке» қажет пластик бөлшектерді түгелдей Қостанайда өндіре бастады.
– Біздің зауыт өз дамуындағы жаңа бір кезеңді еңсерді. Пластиктен жасалатын компоненттер өндірісін іске қосу оңай болған жоқ. Зауыт мамандары Санкт-Петербургте оқып келді. Нәтижесінде, қазір трактордың алдыңғы және артқы доңғалақтарының жабын қанаттарын, аккуммулятор батареясының қаптамасын, кабинаның төбесін және капотты өзіміз жасаймыз. Әсіресе, капот жасау аса қиын. Ол үшін пішіні әртүрлі 19 қосымша деталь жасап шығару керек. Сонымен қатар жаңа құрылғыны меңгерудің нәтижесінде балластық жүкті, яғни техниканың тепе-теңдігін сақтауға қажет құралды өндіруді игердік. Шартты түрде, бір тракторға мұндай бөлшектің 80 шақтысы қажет. Оның бәрінің салмағы 1 мың килодан асады. Бір ауысымда біз 162 балластық жүк шығарамыз, ал бір маусымда оның саны шамамен 40 мыңға жетеді, – деді Қостанай трактор зауытының директоры Динара Шүкіжанова.
Компания басшысының айтуынша, Қостанай трактор зауыты екі жыл ішінде өндірісті дамытуға серпін беретін біраз шаруаның басын қайырған. Бүгінгі таңда өндірісті өрістетуге қажет заманауи жабдықтар, сенімді серіктестер бар. Қазір кәсіпорын қуаты 300 және 420 ат күшіне тең «Кировец» тракторларын шығарады.
Биыл тракторларды әлі де жаңарта түсу жоспарланып отыр. Мәселен, К-7М тракторларындағы жаңа гидрожүйе енді біріздендірілетін болады. Сондықтан әр трактор қашықтан басқару жүйесімен жабдықталады. Бұл техниканың тұрған жерін, оның жылдамдығын, отын шығынын, қозғалтқыштың жай-күйін онлайн режімде бақылауға мүмкіндік береді.
Қостанай облысы
