Коронавирус • 19 Қаңтар, 2022

Вирус ошағы – қоғамдық орын

335 рет көрсетілді

«Қызыл аймақтағы» Атырау облысында коронавирус инфекция­сын жұқтырғандар саны күн сайын көбейіп барады. Облыстық санитарлық-эпидемиологиялық бақылау департаментінің бас маманы Гүлдана Бисембайдың мәліметінше, Атырауда коронавирус инфекциясын жұқтырудың алғашқы дерегі 2020 жылғы 28 наурызда тіркелген. Содан бері қауіпті вирусты 55 мыңнан астам адам жұқтырыпты.

– Коронавирус инфекциясын жұқтырудың негізгі оша­ғы ретінде қоғамдық орындар анықталып отыр. Соңғы аптадағы талдау көрсеткендей, науқастардың 64,4 пайызы індетке адамдар көп жиналатын орындарда шалдыққан. Ал 2,5 пайызы қоғамдық көлікте, қалғаны науқастармен жақын қарым-қатынас жасау арқылы жұқтырды, – дейді Гүлдана Би­сембай.

Қауіпті вирус әсіресе, Атырау қаласы мен Жылыой ауданында орналасқан «Теңіз» кен орнында ушығып тұр. Аты жаман індеттің «қақпанына» ілінген науқастар легі жеті ауданда да байқалып отыр. Тіпті коронавирус инфекциясын облыс әкімі Махамбет Досмұхамбетов пен оның бірінші орынбасары Серік Айдарбеков жұқтырып алды. Облыс әкімінің баспасөз қызметі таратқан ақпа­ратқа сүйенсек, олардың Covid-19 инфекциясын анықтауға тап­сырған ПТР сынамасы оң нәтиже көрсетіпті. Сол себептен, әкім мен бірінші орынбасары 12 қаңтарда қашық­тан жұмыс істеуге көшкен.

Облыстық денсаулық сақтау басқармасы басшысының орынбасары Қайсар Абдалиевтің айтуына қарағанда, эпидемиялық ахуал күрделеніп отыр. Осыған байланысты өңірде қосымша инфекциялық 1 760 төсектік орын ашуға тура келген.

– Инфекциялық стационар­лардағы қосымша төсектік орын тек Атырау қаласында емес, «Теңіз» кен орны мен жеті ауданда да көбейтілді. Қазір 29 мобильді бригада жұмыс істейді. Дәрі-дәрмек қоры жеткілікті, – деп мәлім етті Қайсар Абдалиев.

Өңірде жыл басынан Pfizer вакцинасының екі компонентіне арналған 126 мың 520 дозасы жеткізілген. Осы кезге дейін бұл вакцинаны 3 626 адам сал­дырған. Оның ішінде бала емізіп отырған 1 789 ана мен 191 жүкті әйел бар. Сондай-ақ 12-18 жас аралығындағы 1 646 жасөспірім аталған вакцинаны ектірген.

Мұнайлы өңірдегі эпидемия­лық ахуалдың нашарлағаны облыстық санитарлық-эпиде­миологиялық бақылау депар­та­мен­тінің мамандарын алаңда­тып отыр. Сол себептен, бас са­нитар дәрігердің міндетін атқарушы А.Бекешеваның қау­лы­сымен карантиндік шектеу шаралары күшейтілді. Ashyq жобасына қатысатынына қара­мас­тан концерт залдары мен филармониялардың, театрлар мен цирктердің қызметіне, ді­ни бірлестіктер нысандарында жұма намазы мен өзге де діни іс-шараны өткізуге тыйым салынды. Мұндай тыйым түнгі клубтар мен қоғамдық тамақ­тану нысандарындағы ән айту және биге, караоке қызметіне де қолданылады. Сондай-ақ от­басылық банкеттер, үйлену той­лары, мерейтойлар, үйде өткізі­летін еске алу тұрғысындағы басқосуларды, ашық ауада, үй-жайлардың ішінде бұқаралық іс-шараларды өткізуге шектеу қойылды.

 

Атырау облысы

Соңғы жаңалықтар

Жібектің жарқын жеңісі

Спорт • Бүгін, 08:37

Ұқсас жаңалықтар