Жасыратыны жоқ, аталған салада шешілмеген мәселелер көп және олар біраз уақыттан бері күн тәртібінде өткір тұр. Мәселен, монополистер қит етсе субсидия мөлшерін арттыру жөніндегі әңгімені жөн-жосықсыз қозғай беретін. Енді олар қызмет көрсету сервисінің деңгейін жоғарылатпайынша, бұл туралы ауыз аша алмайды. Бұл турасында облыс әкімдігінде өткен онлайн-кеңесте өңір басшысы Жеңіс Қасымбек айтты.
– Жолаушылар тасымалы сапасына қатысты шағымдар өте көп. Тұрғындар әлеуметтік желілерде жазады. Маған тәртіп орнату туралы өтініштер келеді. Автобустардың жетіспеуіне, кестенің сақталмауына, жүргізушілер мен кондукторлардың дөрекілігіне, санитарлық талаптардың бұзылуына шағымданады, – деп кемшіліктерді жіпке тізді облыс әкімі.
Қарағандыдағы ең ірі тасымалдаушының бірі – №3 автопарк директоры Артур Григорян кәсіпорынның бірқатар проблемасын тілге тиек етіп ақталғанымен, айтылған сынмен келіспеске амалы қалмады.
– Қызмет көрсету мәдениетіне келетін болсақ, біз мұны білеміз. Күн сайын, ай сайын біздің кәсіпорын бойынша елуге жуық шағым түседі. Бірақ бұл жерде ешкімді ақтағым келмейді. Шағымдардың санын азайту керек, – деді ол.
Аталған автопарк директорының айтуынша, автопарккке еңбекақысы аз болғандықтан жүргізушілер келмейді. Бұдан өзге пандемия кезінде жолаушылар саны азайып кеткен. Сәйкесінше, амортизациялық шығындар өсе түсті.
Онлайн-кеңесте жүргізушілердің жетіспеушілігі және субсидиялар мөлшерін арттыру қажеттілігі туралы Қарағанды мен Теміртаудың басқа тасымалдаушылары да айтты. Бұған облыс әкімінің берген жауабы нақты әрі қатаң болды.
– Біз субсидияларды көбейтеміз. Бірақ сіздер сапалы қызмет көрсетіңіздер және автобустарды жаңарту бойынша міндеттемелер алыңыздар! – деді ол.
Еске салар болсақ, былтыр Саран қаласында шығарылатын отандық өндірістің 40 жаңа автобусы пайдалануға берілген. Облыстық жолаушылар көлігі және автомобиль жолдары басқармасының мәліметінше, Теміртауда – 20, Жезқазғанда – 20 және Саранда дәл осындай 11 автобус жолаушыларды тасып жүр.
Бүгінде Қарағанды қаласында электронды төлем жүйесін енгізілгенін айта кеткен ләзім. Қазіргі уақытта 160 мыңға жуық ONAY! картасы сатылыпты. Қала әкімі Ермағамбет Бөлекпаевтың айтуынша, қолма-қол ақшасыз төлем бүгінде айналымның төрттен бір бөлігін құрап отыр.
Қарағанды облысы
