Коронавирус • 24 Қаңтар, 2022

Коронавирус қайта күшейді

50 рет көрсетілді

Көпті алаңдатқан коронавирус індеті қайта күшейді. Қазіргі кезде індет жұқтырғандардың саны күрт өскен. Мәселен, осы уақытқа дейін Жамбыл облысы аумағында коронавирус инфекциясының 23 275 жағдайы тіркеліп, 8 361 тұрғын пневмонияға шалдыққан. Ал өңірде өткен тәулікте 257 адам қауіпті індетті жұқтырып, 6 адам өкпе дертімен ауырған.

Облыстық денсаулық сақ­тау басқармасының басшысы Әсет Қалиев індетке тап бол­ғандардың ішінде 13 465 тұр­ғын Тараз қаласынан екенін айтты. Бұл күнде коронавирус індеті облыс орталығында жиі тіркелуде. Сонымен қатар Байзақ ауданында – 1 647, Жамбыл ауданында – 1 050, Жуалы ауданында – 572, Қордай ауданында – 2 065, Т.Рысқұлов ауданында – 530, Меркіде – 682, Мойынқұмда – 332, Сарысуда – 359, Талас ауданында – 560 және Шу ауданында 1 781 жағдай анықталған.

«Әскерге шақырылушылар арасынан 125 жағдай, басқа облыс тұрғындары арасынан 99 дерек тіркелді. Пневмония туралы айтсақ, Тараз қаласында – 2 478 тұрғын, Байзақ ауданынан –

1 141, Жамбыл ауданынан – 705, Жуалыдан – 745, Қордайдан – 300, Т.Рысқұлов ауданынан – 433, Меркі ауданынан – 939, Мойынқұм ауданынан – 196, Сарысу ауданынан – 558, Талас ауданынан – 527 және Шу ауданынан 328 адам ауырған. Өңірдегі өзге облыс тұрғындары арасынан 5 жағдай тіркелді. Қазіргі таңда инфекциялық стационарларда 373 науқас ем алуда. Ал оның ішінде 28 науқас жансақтау бөлімінде жатыр. Карантиндік стационарға 87 азамат орналас­ты. Сондай-ақ өңірдегі 10 зертханада тәулігіне шамамен 2 600 – 2 800 ПТР-зерттеу жұмыстары жүргізілуде», дейді Ә.Қалиев.

Сонымен қатар бүгінде об­лыс бойынша 23 алғашқы ме­дициналық-санитарлық ұйым­дарында 45 егу пункті бар. Оның ішінде 16 пункт Тараз қаласында және 29 пункт облыс аудандарында орналасқан. Бүгінде аймақта 66 мың 824 адам ревакциналаудан өткен.

Қазіргі кезде өңірде ін­деттің алдын алу мақсатында жұмыс күшейтілген. Облыс бойынша санитариялық-эпи­де­миологиялық бақылау депар­таменті басшысының орынбасары Бағлан Қыдырбаевтың айтуынша, жаңа штамдардың таралуын болдырмау үшін ұжымдық иммунитеттің қажетті деңгейіне жету маңызды болып отыр. Сондай-ақ ол індетке қарсы вак­циналар ауыр жағдайларды және ауруханаға жатқызуды азайтатынын айтты.

«Өткен жылғы ақпан айынан бастап аймақта бірінші компонентпен 18 жастан асқан 633 244 адам, екінші компонентпен 563 464 адам егілді. Ал 22 қарашадан бері коронавирусқа қарсы 48 815 адам қайта вакциналанды», дейді ол.

Бүгінгі таңда Жамбыл облысы «қызыл аймаққа» енген. Бұл ретте өңірде тұрғындардың қауіпсіздігін барынша қамта­масыз ету жұмыстары ұйым­дастырылуда. Облыстық білім басқармасының басшысы Бей­құт Жамангөзов бүгінде облыс бойынша 93 мектептің үшінші тоқсанды қашықтан оқытуға жіберілгенін мәлімдеді. Жалпы, аталған 93 мектепте 122 905 оқушы оқитын болса, оның ішінде 84 252 оқушы қашықтан және 38 653 оқушы штаттық режімде оқуларын жалғастыруда.

 

Жамбыл облысы

Соңғы жаңалықтар

ТүркПА-ның атауы өзгереді

Парламент • Кеше

Алматы жолдарын су басты

Аймақтар • Кеше

Ұқсас жаңалықтар