Аймақтар • 26 Қаңтар, 2022

Қоғамдық көліктегі қамсыздық

Қостанай облысында бүгінге дейін «омикрон» штамы тіркелген жоқ. Алайда облыстық денсаулық сақтау басқармасының өкілдері өңірде 224 баладан Covid-19 анықталғанын жеткізді. Қазір қауіпті індет жұқтырған 11 бала ауруханада, қалғандары амбулаториялық ем қабылдап жатыр.

Нұрқанат ҚҰЛАБАЕВ

Коллажды жасаған Қонысбай ШЕЖІМБАЙ, «EQ»

Сондай-ақ өңірде 190 жүкті әйел короновирус жұқтырып, 30-ы ауруханаға түскен. Дәрігерлер биыл балалар мен жүкті әйелдердің індет жұқтыру қаупі жоғары дейді. Салыстырмалы түрде айта кетсек, 2022 жылдың 10 қаңтарындағы жағдай бойынша 54 бала мен 7 жүкті әйелден Covid-19 анықталған.

Баласы науқастанып жатқан ата-аналардың бірі өз ұлының қауіпті індетті қоғамдық көлікте жұқтырып алуы мүмкін екенін айтып отыр. Айтса айтқандай-ақ, әсіресе автобустағылардың алаңғасарлығы алаңдатады. Біріншіден, қоғамдық көлікте бетперде тағу мәселесі бақыланбайды. Қоғамдық көлікке отыра қалсаңыз, маска таққан 4-5 адамды ғана көресіз, қалған жұрт – жайбарақат. Тіпті жүргізушілердің өздері біраздан бері бетперде тағуды ұмыта бастады. Екіншіден, қала ішінде жүретін автобустардың тең жартысы ескі, есігі дұрыс жабылмайды. Қаңтардың қақаған аязында саңылаудан соққан суықтан салонның іші тоңазытқышқа айналып, жолаушы діттеген жеріне дірдектеп жетеді. Автобустағы тәртіп бақылауға алынбаса, тұмау тиіп, қызуы көтеріліп, жөтелге булыққандардың саны азаятын емес.

Эпидемиялық жағдайдың күрделене түсуін «омикрон» штамының өршуімен байланыстырған өңірдің бас санитарлық дәрігері облыста ревакциналауды кешіктірмей іске асырудың маңызды екенін ескертті.

Таяуда өңірге «Спутник лайт» вакцинасының 5 мың дозасы жеткізілді. Жаңа препарат қазір облыстағы барлық емдеу мекемелеріне таратылып жатыр.

Қостанай облысы