Қазақстан • 26 Қаңтар, 2022

Жерді пайдалану бойынша бірқатар өзгерістер енгізілді – АШМ

176 рет көрсетілді

2014 жылдан бастап жерді пайдалану мен қорғауды мемлекеттік бақылау функциялары толығымен жергілікті атқарушы органдарға жүктелді, 2022 жылдан бастап бірқатар өзгерістер енгізілді, деп хабарлайды Egemen.kz ҚР АШМ баспасөз қызметіне сілтеме жасап.

Бұрын жер қатынастары және мемлекеттік бақылау басқармалары облыстық, қалалық және аудандық әкімдіктердің құрамына кірген, онда «мүдделер қақтығысы» орын алып, жер қатынастары және жердің пайдаланылуы мен қорғалуын бақылау жөніндегі уәкілетті органдардың бір мемлекеттік органда болуына байланысты сыбайлас жемқорлық сипатындағы шешімдер қабылдау тәуекелдері болған.

Мемлекет басшысының 2021 жылғы 19 наурыздағы ҚР Президенті жанындағы Ұлттық қоғамдық сенім кеңесінің V отырысында берген тапсырмасына сәйкес Жер реформасы жөніндегі Комиссия құрылды. Комиссияның 5 отырысы аясында 120-дан астам ұсыныс көтеріліп, жер заңнамасын жетілдіру бойынша бірқатар жүйелі ұсынымдар әзірленді. Ұсыныстардың бірі «орталық - өңір» қағидаты бойынша жерді ұтымды пайдалануға мемлекеттік бақылаудың бірыңғай вертикалын құру болды.

Осыған байланысты, 2021 жылғы 30 маусымда «Қазақстан Республикасының кейбір заңнамалық актілеріне жер қатынастарын дамыту мәселелері бойынша өзгерістер мен толықтырулар енгізу туралы» ҚР Заңы қабылданды. Ол жердің пайдаланылуы мен қорғалуын мемлекеттік бақылау функцияларын 2022 жылғы 1 қаңтардан бастап аумақтық бөлімшелерін құра отырып, орталық уәкілетті органның ведомствосына беруді көздейді. Осылайша, жер беру жөніндегі функциялар әкімдіктерде қалды, ал әкімдіктердің жер беруін және меншік иелерінің/жер пайдаланушылардың жерді пайдалануын бақылау жөніндегі функциялар аумақтық департаменттерді құру арқылы ҚР АШМ Жер ресурстарын басқару комитетіне берілді.

Осылайша, «орталық - өңір» қағидаты бойынша Қазақстанда жерді пайдалану мен қорғауды мемлекеттік бақылаудың бірыңғай вертикалі құрылып, жер қатынастары саласында жинақталған проблемаларды шешу мен тәртіпке келтіру үшін аса маңызды қадам жасалды.

Соңғы жаңалықтар

Ұқсас жаңалықтар