ӘЛЕМ ӨТКЕН АПТАДА

БИЛІКСІЗ ПАРЛАМЕНТ Ұлыбританияда өткен парла­мент сайлауында күткендегідей 13 жыл билікте болған лей­бо­рис­тер партиясы жеңіліс тапты. Бір­ақ жеңіске жеткен консерва­тор­лар партиясының да жеке-дара үкі­мет құруға мүмкіндігі жоқ. Пар­ламенттегі 650 орынның  305-і консерваторларға, 255-і лей­бористерге, 61-і лейберал-де­мократтарға тиіп отыр. Енді мә­селе коалицияға барып тіреледі. Лейбористер мен консерваторлар одақтаспайтыны анық. Үкімет тағдырын либерал-демократтар­дың кіммен одақтасатыны шеш­пек. Алда-жалда коалиция құру­дың сәті түспесе, жаңа парламент сайлауы өтуге тиіс. ГРЕКТЕР ҚЫСПАҚТА Грекия дағдарыс құшағында. Басқаларға қарыздар, қаржысы тапшы. Соған орай жалақыны, зейнетақыны қысқартпақ. Амал жоқтықтан. Көп адам оны тү­сін­гісі жоқ. Үкімет қысастықпен жа­сап жатқандай көреді. Сөйтіп, қар­сылық білдіріп жатыр. Қар­сылық болғанда, әлдекімдердің арандатуларымен жастар қол жет­кенді қиратып, жанатынды өр­теуге кірісті. Сондай-ақ елде жаппай ереуілге шығу өріс алды. Оны ұйымдастырған кәсіп­одақ­тардың мәлімдеуінше, оған 100 мыңнан астам адам қатысқан. УКРАИНДЫҚТАР ТӨБЕЛЕСКІШ Ағайынды боксшылар Клич­ко­ларды әлем жұртшылығы бі­леді. Олар әлемге украиндардың қалай төбелесе алатынын таныт­қан. Сірә олардан депутаттар мен шенеуніктер де қалысқысы жоқ. Жақында парламенттегі төбелесті талай күн телеарналардан бүкіл әлем тамашаласа, күні кеше эко­номика министрі Василий Цуш­ко өзіне келген оппозиционер депутат Антон Яценконы иектен ұрып, сұлатып салыпты. Себебі, айқын емес – сөзін өткізе алма­ған депутат, қандай ниетпен еке­нін өзі біледі, министрге тұра ұм­тылса керек, сонда кабинет иесі қарсы соққы жасаған көрінеді. ТІЛ ТАБЫСУҒА ЖАҚЫН Екі айға жуық қасарысқан қарсылықтан кейін Таиланд оппозициясының басшылығы биліктің ұсыныстарын қарауға кірісті. Премьер-министр Абхи­сит Ветчачиваның үкіметі қараша айында сайлау өткізуді ұсынып отыр. Ал оппозиция бұған дейін үкіметтің қызметтен кетуін, пар­ламентті таратуды талап еткен бо­латын. Үкімет белгілі дәрежеде ыңғайға жығылса, бұл ең алды­мен адамдардың құрбандығына жол бермеуді ойлағаны анық. Бұған дейін қақтығыстан 27 адам қаза тапқан еді. Дегенде, оппо­зи­цияның халық сайлаған парла­ментті таратуды талап етуін не­гіз­ді деуге келмейді. БАНКИР – ҚЫЛМЫСКЕР Осыдан бірнеше жыл бұрын ғана Исландия әлемдегі ең тұ­рақ­ты, адам өмір сүруіне ең қо­лай­лы елдердің бірі саналатын.  Содан әлемдік дағдарыс денде­ген­де, ең алдымен қыспаққа түс­кен де Исландия болды. Шағын елдің жетекші – үш банктің қа­рызы 61 миллиард долларға же­тіп, үкімет оларды мемлекет ие­лігіне алуға мәжбүр болды. Сол үш банктің ең ірісі Kauptіngтің күйреуіне тек дағдарыс қана емес, оның жетекшісі Хейдар Мар Сугурдссон да айыпты екен. Ол құжаттарды қолдан жасап, биржада алдамшы ойындар өт­кізіп, тағы басқа қулық-сұм­дық­пен біраз банк қаржысын жым­қырыпты. Енді банкир тұтқынға алынып отыр. ҰЛТЫ КӨРСЕТІЛМЕЙДІ Бұдан былай ресейлік төл­құ­жат­тарда иесінің ұлтын көрсете­тін графа болмайды. Неге бұлай деп айқайлағандар болған екен, оған елдің конституциялық соты заңдық тұрғыда бір ұлттың өкілі болу Ресей азаматтығын алуға ықпал етпейді деп жауап беріпті. Енді мен аға ұлттың өкілімін. Мем­лекет құраушы  ұлттың өкі­лімін деп ешкімнің басқаларға қожаңдауына жол берілмейді. МАОИСТЕРДІҢ ТАЛАБЫ Непалда маоистік ұйымдар­дың бастамасымен басталған қар­сылық ак­циясы барған сайын кең етек алып отыр. Олар үкі­меттің кетуін та­лап етеді. Жаппай ереуілдің сал­дарынан дүкендер, тамақтан­дыру орындары ғана емес, кәсіп­орындар да жұмысын тоқтатыпты. Мектеп­тер де, мем­лекеттік меке­мелер де жабылған көрінеді. Осы­ған қа­рағанда, елде маоистердің ықпалы айтарлықтай екенін аңғарасың. Әзірлеген Мамадияр ЖАҚЫП.