Оралда 38 кәсіпкерді алдаған серіктестік басшысы қамауға алынды

Батыс Қазақстан облысының Орал қаласында 38 кәсіпкерден 1 млрд.теңгені алдап алған серіктестік басшысы қолға түсті. Бұл туралы «Хабар» телеарнасы хабарлады. «Акела» жауапкершілігі шектеулі серіктестігінің жетекшісі Алина Хакало Орал қаласындағы кәсіпкерлерге өзін әлеуметтік жобаларды қолдайтын АҚШ-тың USAID бағдарламасының жергілікті операторы ретінде таныстырып, олармен грант қорын құру жөнінде келісім-шартқа отырған. Осыдан кейін кәсіпкерлер оның есеп-шотына қаржы аударыпты. Шетелдік бағдарламаның шарапатын көрмек түгілі өз ақшаларын қайтара алмаған кәсіпкерлер шарасыздықтан құқық қорғау органына арызданады. Артынан осы келіншектің Алматы және Ақтөбе облыстарының да кәсіпкерлерін тақырға отырғызғаны мәлім болды. «Қазір Алина Хакалоның үстінен қылмыстық іс қозғалды. Оның жәбірленушілерге келтірген залал құны-1 млрд.теңге»,-деді Батыс Қазақстан облысы бойынша ішкі істер департаменті тергеу басқармасы бастығының орынбасары Мағауия Құрмашев. Әмірхан Алмағанбетов. Дереккөз: «Хабар» телеарнасы. Фото: Dumskaya.net.