Путин Қырым тәуелсіздігін мойындайтын құжатқа қол қойды

Ресей Президенті Владимир Путин «Қырым Республикасының тәуелсіздігін мойындау туралы» Жарлыққа қол қойды. Бұл туралы ИТАР-ТАСС хабарлады. «2014 жылы наурыздың 16-ы күні қырымдықтардың қатысуымен Қырым республикасының тәуелсіздігі мен мәртебесін айқындау мақсатында өткізген жалпыхалықтық референдумның өтуіне байланысты Севастополь қаласы тәуелсіз ел ретінде жарияланған мемлекетте айрықша мәртебеге ие. Бұл Жарлық қол қойылған күннен бастап күшіне енеді», - делінген хабарламада Бүгін, 18 наурыз күні В.Путин Кремльде Мемлекеттік Дума депутаттары, Федерация Кеңесінің мүшелері, Ресейдегі аймақ басшылары мен азаматтық қоғам өкілдері алдына шығып, Қырым Республикасы мен Севастополь қаласының Ресей Федерациясы құрамына кіргендігін ресми түрде жариялайтын болады. Мемлекеттік Думаның Ресей Конституциялық сотындағы өкілі Дмитрий Вяткиннің  атап өткеніндей, Қырымның тәуелсіздігі мойындалғаннан кейін ол елдің Ресей құрамына кіргендігі өзге мемлекеттерге жарияланады.Ал осыдан кейін халықаралық келісімге қол қойылып, аталған субъектінің Ресей Федерациясы құрамына кіргені туралы жаңа заң мақұлданады. Айдар Өрісбаев. Дереккөз: ИТАР-ТАСС Фото: Itar-tass.com.