Мәселен, Қостанай облысының тұрғындары былтыр маусым айынан бері іске асырыла бастаған мемлекеттік шығармашылық тапсырыс жобасының игілігін көріп отыр. Жобаға әу баста ата-ана да, бала да онша ынта білдіре қоймап еді, жыл соңына қарай сан түрлі өнерге баулитын тегін үйірмелерге барып, талабын ұштап жүрген балғындардың саны 2 мыңға жетті. Биыл айтулы жобаның ауқымы бұдан да кеңейе түсетін сыңайлы.
– Былтыр тегін үйірмелердің жұмысын қамтамасыз етуге облыстық бюджеттен 77 млн теңге қаржы жұмсалды. Бұл – көпшіліктің тегін үйірмелердің ашылып жатқанынан әлі хабардар бола қоймаған кезі. Есесіне биыл мемлекет қаржыландыратын шығармашылық орталықтарға деген сұраныс едәуір артты. Осыған орай, 600 млн теңгеге тапсырып бердік. Жыл басында 300 млн теңге бөлінді. Енді ел сұранысын ескере отырып, алдағы уақытта тағы да тапсырыс беріледі. Оған облыс бюджетінің мүмкіндігі жетеді, – деді облыстық мәдениет басқармасының басшысы Ерлан Қалмақов.
Басқарма басшысының айтуынша, баланы шығармашылық үйірмеге бергісі келген ата-аналар artsport.edu.kz бірыңғай порталы арқылы өздері тұрып жатқан мекенжайға жақын әрі ыңғайлы үйірменің бағытын, орнын анықтап, оған электронды түрде өтінім бере алады.
Бүгінде өңірде шығармашылық мемлекеттік тапсырыс аясында бес мыңға жуық бала тегін үйірмеге барып жүр. Мысалы, облыс орталығының өзінде ғана 3243 бала тегін үйірмеде талабын ұштауға мүмкіндік алып отыр. Ал Арқалықта – 591, Лисаковта – 156, Тобылда – 154, Рудныйда – 179, Жітіқарада – 227, Қарабалықта 93 бала мемлекет қаржыландыратын үйірмелерге барып жүр.
Алдағы уақытта, әсіресе, ауыл балаларын шығармашылыққа көптеп тарту мақсатында Қостанай, Алтынсарин, Науырзым аудандарындағы мәдениет ошақтарында ұлттық өнер орталықтарының жұмысын жандандыру қолға алынбақ.
Қостанай облысы
