Облыс мектептерінде балалар мен ата-аналарға қауіпті індеттің алдын алудың жалғыз жолы вакцина қабылдау екенін түсіндіру жұмыстары әлі де жүріп жатыр. Бұл мәселе төңірегінде бұған дейін онлайн режімде дәрігерлер, ұстаздар мен ата-аналар қатысқан бірнеше рет жалпы мектепаралық жиналыстар өткен. Қазір санитарлық-эпидемиялық дәрігерлер жеке-жеке білім ошақтарына арнайы барып, ата-аналарға вакцина қабылдаудың маңызы мен оның пайдасы, артықшылықтары туралы түсіндіруде. Мұндай жұмыстар нәтижесіз емес, әу баста екпеден үзілді-кесілді бас тартқан ата-аналардың біразы мән-жайды енді түсіне бастаған. Мәселен, таяуда Қостанайдағы №115 мектепте ата-аналарының қатысуымен он шақты оқушы вакцина қабылдады.
– Бүгін бізде 12 ата-ана балаларына Comirnaty Pfizer вакцинасын ектіру туралы өтініш білдірді. Оқушылар екпені мектеп қабырғасында, арнайы егу бөлмесінде алып жатыр. Бұған дейін 11 балаға егілді. Жалпы, жыл басынан бері 19 оқушы коронавируспен ауырып шықты. Жұқпалы дерттің жолын кесу үшін бізге ұжымдық иммунитет қалыптастыру қажет. Мұны ата-аналардың да түсіне бастағаны қуантады, – деді мектеп медбикесі Гүлбану Жұмабаева.
Вакцина алып шыққан 11 сынып оқушысы Әмина Базарбаева қасына анасын ертіп келіпті.
– Қазір қалада тұмау өршіп тұр. Айналамыздағы туыстарымыз, көрші-қолаң, таныстарымыздың бәрі
ауырып шықты. Сондықтан өзіміз ақылдасып, вакцина қабылдау керек деп шештік. Жолдасымыз екеуіміз екпенің үш компонентін алдық. Қызым биыл 11 сыныпты бітіргелі отыр. Вакцина балаға да артық етпейді. Қайта пайдасы тиеді. Біріншіден иммунитет қалыптастырады. Бұл сұмдық ауруды тек вакцина арқылы жеңіп шығамыз, – дейді Әминаның анасы Жаңылхан Мүслімова.
Қостанай облысы
