Өңірлік бөлініске салсақ, ел азаматтарының басым көпшілігі Алматы облысында қоныстанған – 2,1 млн адам. Үздік үштікке сондай-ақ 2,1 млн адаммен Түркістан облысы, 2 млн тұрғынмен Алматы қаласы кіреді. Бұл үш өңір бүкіл ел халқының үштен бірін құрайды. Халық ең аз қоныстанған өлке – Солтүстік Қазақстан облысы. Теріскейдегі жұрттың саны 540 мың адамды маңайлайды.
Осы көрсеткіштер фонындағы ең қызық дерек – Қазақстан деген есімі бар 24 азаматтың бар екені. Мемлекет атауын иеленген азаматтардың көбі Ақмола облысында тұратын болып шықты. Олардың саны – 6 адам. Сонымен қатар Қарағанды облысында – 4, Қостанайда – 3, Шымкентте – 2, Алматы, Батыс Қазақстан және Маңғыстау облыстарында 1 Қазақстан өмір сүріп жатыр.
Бұдан бөлек қала атауын иеленген қазақстандықтар да бар. 28 адамның есімі Семей болса, ата-аналар балаларына Алматы және Түркістан деген де есімдер берген. Сондай-ақ Атырау, Тараз, Қостанай, Ақтау, Нұр-Сұлтан, Шымкент, Ақтөбе, Талдықорған атауын есім қылып жүрген жандар да баршылық.
