С.Өтебаев атындағы Атырау мұнай және газ университетінде академиктің 90 жылдығына орай «Ғылыми дәстүрлер сабақтастығының және мамандыққа адалдықтың жарқын үлгісі» тақырыбында Нәдіров оқулары өтті. Оған отандық мұнай-газ саласындағы танымал әріптестері мен ғалымның отбасы қатысты. Аталған іс-шараға онлайн форматта қосылған Ресей Федерациясының, Әзербайжан мен Қырғызстан Республикасының ғалымдары ғибратты ғұмыр иесі туралы естелігімен бөлісті.
Академик мұнай-газ өнеркәсібі үшін білікті мамандар даярлауға да үлес қосқан. Кейін мұнайлы облыстың құрметті азаматы атанды. Енді міне, С.Өтебаев атындағы Атырау мұнай және газ университетінің базасында ашылған химиялық инженерия және экология институтына беріліп, ескерткіш тақта қойылды.
– Нәдір Нәдіров – көп қиындық көрген ғалым. Кезінде Қызылорда өңіріне жер аударылып келіп, өзінің «халық жауы» емес екенін дәлелдеу үшін мыңдаған құжат жинап, оқуға түсті. Кейін әйгілі ғалым атанды. Академик тек бір саламен шектелмей, ғылымның бірнеше саласын игерді. Сондықтан бүгінгі жастар мұнай химиясына ғана байланып қалмай, өз мүмкіндігін кеңейтуге назар аударуы керек, – дейді Парламент Сенатының депутаты Бақытжан Жұмағұлов.
Атырау облысы
