Қолындағы барын бөлісіп, жарым көңіл жандардың жаңа мекенге сіңісіп кетуіне сеп болыпты. Бұл сонау қиырдан келіп, қазақ жеріне қоныс тепкендердің бүгінгі ұрпағы мәңгі ұмытпайтын тарих.
Жергілікті халықпен біте қайнасып, ел бақытын бірге қаласқан сол аталарымыз өзінен кейінгілерге қиын кезде қанатының астына алған халықты, ортақ Отанымыз – Қазақстанды құрметтеуді табыстапты. Біздің бірлігіміздің қазығы осылай қағылған.
Мен дүниеге келген Ақмая ауылында көптеген этнос өкілдері тату-тәтті ғұмыр кешіп отыр. Осы ауылдағы қазақ мектебінде білім алдым. Мектепте оқып жүрген кезімнен «Абай оқуларына» қатысып, әлемдік ақыл-ойдың шыңына жеткен дананың 200-ге жуық өлеңін жаттадым. Одан бөлек, бір поэмасын бастан-аяқ айта аламын. Осылайша ұлы ойшылдың ізгілікке салған рухани жолы түрлі ұлттарды бір-біріне жақындастыра түскеніне көзім жетті. Қазір Қорқыт ата атындағы Қызылорда университетінде қазақ тілі мен әдебиеті мамандығы бойынша білім алып жатырмын.
Бүгінде жалпыхалықтық мерекеге айналған Алғыс айту күні – біздің ортақ тарихымыздың символы. Қазақстан құтты қонысына айналған түрлі этностардың миллиондаған өкілдерінің қазақ халқына терең тағзымының белгісі. Бастарына түскен ауырпалықты қайыспай бірге көтере білген жұртқа деген жүрекжарды ризашылығы. Мейірім мерекесіне айналған атаулы күн кешегіге деген құрмет қана емес, біртұтас елдің ертеңіне сенімнің айғағы. «Кең болсаң, кем болмайсың» деген тағылымды тәмсілді ұстанатын қазақ ұлтына алғыс айту, кешегі қиындықты көзімен көрген алдыңғы буынның бізге деген аманаты. Бұл күні біз бабаларымызды ризашылықпен еске аламыз, ата-аналарымызға, мұғалімдерімізге, достарымызға, соңғы жылдары індетпен күресіп, мыңдаған жанды ажал тырнағынан арашалап жатқан дәрігерлерге алғыс айтамыз.
Елена ПАК,
Қорқыт ата атындағы Қызылорда мемлекеттік университетінің 4-курс студенті
