Іс-шараға арнайы келіп қатысқан өңір басшысы Жеңіс Қасымбек қасіретті қаңтарда қоғамдық тәртіпті сақтау кезінде қаза тапқан сарбаздардың ерлігін атап өтіп, олардың туыстарына Отанның нағыз патриоттарын тәрбиелегені үшін алғыс сезімін жеткізді. Сонымен бірге қазақстандық белгілі суретші батырлардың бейнесі салынған портреттерін ата-аналарына табыс етті.
Бұдан бөлек пандемия кезінде ерлік істерімен, жанкешті еңбегімен көзге түскен еріктілер мен донорлар, меценаттар, полиция қызметкерлері мен өрт сөндірушілер, журналистер сый-құрметке бөленді.
Облыс әкімі бұл мамандық иелерінің тәулік бойы жұмыс істеп, өзара көмек пен ынтымақтастықтың үлгісін көрсеткенін және олардың мұны жүрек қалауымен жасағандықтарын айтты.
– Сынақтың қиын күндерінде өзінің азаматтық және кәсіби борышын адал атқарған әрбір адам шынайы алғыс пен жылы лебізге лайық деп санаймын, – деді Ж.Қасымбек.
«Отзыв» қайырымдылық қорының негізін қалаушы Александр Корогодов ауру балалардың аналары қоңырау шалып, көрсетілген көмектің шарапаты тигенін айтқанда, әрдайым бойды шаттық билейтінін айтты.
– Бұл біздерді кереметтей шабыттандырады және ілгері жылжуымызға көмектеседі. Жақсылық жасау – көңілімнің хошы, – деді ол ағынан жарылып.
Алғыс айту күнінің қарсаңында чешен-ингуш ұлттық-мәдени орталығы қайырымдылық акциясын ұйымдастырып, 225 көпбалалы отбасы мен жалғыз басты аналарға қолдау көрсеткені белгілі болды. Ал осы істерге ұйытқы болған орталық төрағасы Увайс Джанаев көпэтносты халқымыздың бірлігі Алғыс айту күнінің маңызды факторларының бірі екенін ерекше атап өтті.
ҚАРАҒАНДЫ
